«QazMunaıGaz» Ulttyq kompanııasy» AQ adamı resýrstardy basqarý jónindegi atqarýshy dırektory Dáýletjan Hasanov OKQ-da ótken baspasóz máslıhatynda kompanııada daǵdarysqa qarsy strategııa jasalyp jatqanyn málimdep, qarjylyq máselelerge baılanysty qyzmetkerleriniń jalaqysy qysqarady dep atap aıtty.

– Buǵan deıin «QazMunaıGaz» Ulttyq kompanııasynyń ortalyq apparatynda jumys isteıtin qyzmetkerlerdiń sanynyń azaıatyny týraly habarlaǵan bolatynbyz. Koronavırýstyq pandemııaǵa baılanysty munaı ónimderine suranystyń tómendeýi kompanııanyń qarjylyq jaǵdaıyna keri áser etip otyr. Buǵan deıin habarlaǵanymyzdaı birinshi toqsanda bizdiń kompanııanyń tabysy, ótken jyldyń osyndaı kezeńimen salystyrǵanda 3 esege qysqardy. Álemdik naryqta munaı baǵasynyń kúrt quldyraýy saldarynan keıbir bizdiń enshiles kásiporyndarynda qarjy tapshylyǵy baıqalyp otyr, – dedi Dáýletjan Hasanov.

Osyǵan baılanysty «QazMunaıGaz» kompanııasynda daǵdarysqa qarsy strategııa jasalyp jatyr, bul strategııa kompanııadaǵy shyǵyndardy azaıtýǵa jáne daǵdarystan keıingi kezeńde mekemeniń tez ári tıimdi damýyna múmkindik beredi» dep atap ótti.

– Osy sharalardyń aıasynda dırektorlar keńesiniń sheshimi negizinde kompanııanyń jańa qurylymy bekitildi. Osyǵan sáıkes ortalyq apparattyq shtattyń sany 34 paıyzǵa, ıaǵnı 729-dan 480-ge deıin qysqardy. Sonymen qatar ortalyq apparattaǵy departamentterdiń sany 3 ese qysqardy. Basqarýshy dırektorlar laýazymy joıyldy. Osylaısha «QazMunaıGaz»  Ulttyq kompanııasynyń ortalyq apparaty naryqta bolyp jatqan ózgeristerge tez ári tıimdi jaýap bere alatyndaı jınaqy bolyp, qaıta qurylady, – dedi D. Hasanov.

Sondaı-aq ol «QazMunaıGaz» kompanııasynyń basqarma sheshimimen ortalyq apparatta jalaqy tóleýdiń jańa júıesi bekitilgenin atap ótti.

– Ol júıe boıynsha «QazMunaıGaz» basshylyq quramynyń jalaqysy 30 paıyzǵa azaıady. Al basshylyq qyzmetter sanynyń qysqarýyna baılanysty tómengi laýazymǵa taǵaıyndalatyn orta býyndy menedjerlerdiń jalaqylary 20 paıyzǵa deıin tómendeıtin bolady. Basqa qatardaǵy qyzmetkerlerdiń jalaqysy burynǵy deńgeıde saqtalady. Kompanııanyń qarjylyq jaǵdaıyna baılanysty biz syıaqydan bas tarttyq. Endi jyldyń sońyna deıin eshqandaı syıaqy nemese bonýstar tólenbeıdi. Munaı naryǵynda qalyptasqan jaǵdaı qanshalyqty qıyn bolsa da biz árbir qyzmetkerdiń, olardyń otbasylarynyń aldyndaǵy áleýmettik jaýapkershiligin tolyq sezinemiz. Sondyqtan «Samuryq-Qazyna» qorynyń tapsyrmasy boıynsha áleýmettik jaýapkershilikti bosatý baǵdarlamasyn ázirledik. Osy baǵdarlamaǵa sáıkes biz bosatylǵan  qyzmetkerlerge barynsha qoldaý kórsetemiz, – dep aıtty brıfıngte.

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir