Ál-Farabıdiń 1150 jyldyq mereıtoıyna arnalǵan halyqaralyq onlaın konferensııa ótti

Ál-Farabı atyndaǵy Qazaq ulttyq ýnıversıtetiniń janyndaǵy ál-Farabı ortalyǵy "ÁL-FARABI MURASY" atty halyqaralyq onlaın konferensııa ótti.

Konferensııa elimizde atalyp ótip jatqan shyǵystyń ǵulama oıshyly, matematık, mýzyka teoretıgi Ábý Nasyr ál-Farabıdiń 1150 jyldyq mereıtoıyna arnalǵan mádenı jáne ǵylymı is-sharalar aıasynda uıymdastyrylyp otyr.

Konferensııa jumysynda Qazaqstandyq qoǵamnyń rýhanı damýy men qazirgi zamanǵy syn-qaterler kontekstinde ál-Farabı ıntellektýaldyq murasyn zertteýdiń ózekti máseleleri talqylanady. Ǵalymnyń eńbekterine álemniń túkpir-túkpirinen qyzyǵýshylyq tanytatyndardyń da sany artyp kele jatqany da halyqaralyq deńgeıde olardyń basyn qosyp, pikir almasýǵa múmkindik jasaý qajettiligi týyndap otyrǵanyn baıqatady. Sheteldik joǵary oqý oryndary men ǵylymı zertteý mekemeleri jáne ǵalymdary tarapynan ál-Farabıdiń shyǵarmashylyq murasyn zamanaýı qyrynan zertteýge qatysty qyzyǵýshylyqtary onyń aıqyn dáleli bola alady.

Halyqaralyq onlaın konferensııa jumysyna Qazaqstannan, jáne alys-jaqyn shetelderden farabıtaný salasyndaǵy ǵalymdar men jas zertteýshiler qatysty.

Halyqaralyq onlaın konferensııa uly oıshyl, fılosof-ǵalym Ábý Nasyr ál-Farabı babamyzdyń ıdeıalaryn nasıhattaýǵa, zamanaýı Qazaqstan qoǵamynyń rýhanı-adamgershilik jáne ıntellektýaldy mádenıetin damytýǵa, oıshyl muralaryn elimizde jáne alys‐jaqyn shet elderde tanytýǵa baǵyttalǵan.

Qatysýshylar ǵalymnyń búginge deıin qazaq tiline aýdarylmaǵan eńbekterin elimizdiń ǵylymı aınalymyna kirgizý jáne sol is aıasyndaǵy túıtkildi máselelerdi talqylamaq. Sonymen qatar, búginge deıin aýdarylǵan eńbekterin túpnusqamen salystyra otyryp qaıta qarastyrý máselesi de aýdarma isine qatysty ózekti bolyp turǵan isterdiń qatarynda.

Ál-Farabı ortalyǵynyń 2020 jyly jańadań halyqaralyq deńgeıde jumys jasaıtyn ortalyq bolyp qalyptasqanynan beri jáne de ál-Farabı atyndaǵy Qazaq ulttyq ýnıversıtetiniń ǵulamanyń eńbekterine qatysty jańa ustanymy, Farabıdiń uly oıshyl ekendigin aıta bergennen góri onyń ıdeıalaryn izgi qoǵam qurý jolynda zamanaýı qazaq qoǵamyna sáıkes zertteýler men tujyrymdar qalyptastyryp naqty sharalar qolǵa alý bolyp tabylady.

Atalmysh konferensııada osy jáne farabıtaný salasyna qatysty basqa da ózekti máseleler talqylandy.