Almatyda PTR ádisimen barlyǵy 42 myńnan astam test ótkizildi

Erjan Babaqumarov QR Prezıdentiniń tapsyrmalaryn oryndaý máseleleri boıynsha zerthana basshylarymen keńes ótkizdi. Bul týraly Almaty qalasy ákimdiginiń baspasóz qyzmeti habarlady.

Qala ákiminiń orynbasary Erjan Babaqumarov qalanyń memlekettik bas sanıtarlyq dárigeri Jandarbek Bekshınmen vıdeo-konferensııa baılanysy arqyly COVID-19-ǵa zertteý júrgizetin alty zerthananyń basshylarymen kezdesý ótkizdi.

Memleket basshysynyń turǵyndardy koronavırýstyq ınfeksııaǵa testileý kólemin arttyrý jónindegi tapsyrmalaryn oryndaý barysy qaraldy. Búginde Almatyda júrgiziletin zertteýler sanyn kúnine 2,5 myń testke deıin jetkizý mindeti tur. Sondaı-aq zerthanalardyń fýnksııalaryn shekteý jáne zertteletin tulǵalar kontıngenti boıynsha mobıldi brıgadalardy bólý máseleleri talqylandy.

COVID-19 dıagnostıkasy boıynsha júrgizilgen jumystar týraly Almaty qalasynyń memlekettik bas sanıtarlyq dárigeri Jandarbek Bekshın baıandady. Búginde Almaty qalasynda PTR ádisimen koronavırýsty dıagnostıkalaýdy 6 zerthana júzege asyrady: Ulttyq saraptama ortalyǵy, sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy, M. Aıqymbaev atyndaǵy asa qaýipti ınfeksııalar ulttyq ǵylymı ortalyǵy, Ortalyq referens-zerthana, sondaı-aq Qazaqstan-Koreı klınıkasy men «Olımp» KDZ.

Almatyda PTR ádisimen barlyǵy 42 myńnan astam test ótkizildi. Júrgiziletin zertteýler sanynyń kórsetkishi josparly túrde óskeni baıqalady. Test alýdyń maksımaldy qýattylyǵy kúnine 1900 bolǵanyna qaramastan, sońǵy 7 kúnniń ishinde qalada ortasha eseppen 2155 test júrgizildi. Test alý jumysyna barlyǵy 300 qyzmetker jumyldyrylǵan. Sonymen qatar, zerthanalarda nysandar men aýrý oshaqtary aımaǵyna barýǵa arnalǵan mobıldi brıgadalar da qyzmet etedi.

Almaty qalasy ákiminiń orynbasary Erjan Babaqumarov testilerdiń úzdiksiz alynyp, onyń qýattylyǵyn ulǵaıtý úshin zerthanalardy qajetti materıaldarmen qamtamasyz etý máselesin kóterdi.

– Testileý kólemin arttyrý jónindegi Memleket basshysy buıryǵyn oryndaý maqsatynda mamandar áleýetin arttyrý jáne qosymsha medısınalyq brıgadalar qurý qajet, – dep atap ótti E. Babaqumarov.

Almaty qalasy boıynsha Taýarlar men qyzmetterdiń sapasyn baqylaý departamentine qalalyq Qoǵamdyq densaýlyq saqtaý basqarmasymen birlese otyryp, alǵashqy medısınalyq-sanıtarlyq kómek kórsetý uıymdarynyń qyzmetkerlerin zertteý materıaldaryn alý ádistemelerin oqytý josparyn jasaý tapsyryldy.