Tramp: Qytaıdaǵy ólim mólsheri AQSh-tan áldeqaıda joǵary

AQSh prezıdenti Donald Tramp Qytaıdaǵy koronavırýs boıynsha ólim mólsheri AQSh-tan áldeqaıda kóp ekenin aıtty, dep jazady South China Morning Post. 

Basylymnyń jazýynsha, juma kúni AQSh memlekettik hatshysy Maık Pompeo Qytaıdy Ýhan zerthanasyn tekserýge AQSh-qa ruqsat berýge shaqyrǵan.

– Biz Qytaı kommýnıstik partııasynan sarapshylardy Ýhan vırýs zerthanasyna kirgizýin suraımyz. Sonda ǵana vırýstyń qaıdan bastalǵanyn anyqtaı alamyz, – degen Pompeo Fox News-ke bergen suhbatynda.

Pompeonyń pikiri zerthanaǵa qatysty daýdy kúsheıte tússe, AQSh prezıdenti Donald Tramptyń tvıtterdegi jazbasy Qytaıda COVID-19 taralý deńgeıine qatysty kúmándi qoıýlatty.

Tramp  tvıtterdegi jazbasynda "Qytaıdaǵy ólim mólsheri AQSh-tan áldeqaıda joǵary, tipti qaraılas ta emes!" dep jazǵan.

Sondaı-aq AQSh prezıdenti juma kúni jýrnalısterge Qytaıdaǵy ólim mólsheri álem boıynsha eń kóp ekenine senimdi ekenin aıtqan.