Qazaly qyryq kún. Qanisherlerge qandaı jaza?

Búgin Almatyda Erjan Satybaldy men Qajymurat Sheshenqul shańyraǵy maýsym aıynda qanisherler qolynan mezgilsiz mert bolǵan marqumdarǵa qyrqy názir berdi. Qaraly jıynǵa jıylǵan qazaq zııalylary bastaǵan1000-ǵa jýyq adam qazaly otbasyna kóńil aıtty. Jurt talaby – qanisherlerge ólim jazasyn berý. Esterińizde bolsa, 11 maýsymdaAlmaty qalasynyń turǵyny, Qytaıdan kelgen qandasymyz Erjannyń otbasy oryny tolmas qazaǵa ushyraǵan edi. Erjannyń úıinde joqtyǵyn paıdalanyp, onyń jaqyn aǵaıyny 19 jastaǵy Elmurat Sheshenqululy men jary 34 jastaǵy Nurgúl Menesbaevany óltirgen qanisherler dalada oınap júrgen 7 jastaǵy Sylamnur men 3 jastaǵy Syrmuhammetti úıge shaqyryp, tunshyqtyryp óltirgen. Marqumdardyń qazasyna qan jylaǵan jurt qanisherlerdiń ólim jazasyna laıyq ekenin, eger tıisti jazasyn almasa el bolyp qylmystylardan qandy kegin alatyndyqtaryn aıtyp edi...     Erjan Satybaldyuly, Nurgúldiń jary, qos sábıdiń ákesi:

–        Bizge tergeý materıaldarymen tanysýǵa eshqandaı múmkindik berilgen joq. Estýimizshe, qylmyskerlerdiń bireýi qylmysynan jaltaryp jatqan kórinedi. Olardyń ólim qushqanyn kórmeı meniń de, jurttyń da júregi tynshıtyn emes. Eger osyndaı qanypezerlerdi jer basyp, tiri júrýge múmkindik berse, Qazaqstan zańynyń qandaı qasıeti bolmaq! Tipti, sharıǵatta da  qylmystyǵa óz istegen qylmysyna saı jaza taǵaıyndaý kerektigi aıtylǵan emes pe? Mundaı jaýyzdardy aıaýsyz jazalasaq, Qudaıdyń aldynda da, adamnyń aldynda da arymyz taza bolar edi...