Almaty qalasy ákimdiginiń baspasóz ortalyǵynda ótken brıfıngte Almaty qalasy Áleýmettik ál-aýqat basqarmasynyń basshysy Rahat Shımasheva tótenshe jaǵdaı kezindegi áleýmettik qoldaý sharalary týraly aıtyp berdi.

– Almaty qalasy aýmaǵynda tótenshe jaǵdaıdyń engizilýine baılanysty qala halqynyń osal toptaryna jan-jaqty áleýmettik kómek kórsetý jumystary jalǵasýda. Arnaıy qarajat respýblıkalyq jáne jergilikti bıýdjetten, sonymen qosa "Birgemiz" jáne "Jańa Alataý" qoǵamdyq qorlarynyń esebinen bólinýde. Bularǵa qosa aýdan ákimdikterinde iri kásipkerler de qoldaý kórsetýde. Bir aıdan beri bizdiń basqarmada arnaıy call-ortalyq jumys isteýde. Karantın bastalǵaly oǵan 11 myńnan asa qońyraý túsken, – dedi basqarma basshysy.

Osy ýaqyt ishinde Áleýmettik ál-aýqat basqarmasynyń baılanys ortalyǵyna 5825 suraq kelip túsken. Olardyń basym kópshiligi, ıaǵnı 50-60 paıyzy – azyq-túlik sebetine qatysty bolsa, qalǵan 30 paıyzy 42 500 tg qalaı alamyn degen máselege tıesili.

Sonymen qatar, Open Almaty ortalyǵyna – 5193 saýal tússe, Nur Otan partııasy 196 suraq qabyldaǵan.

«Jańa Alataý» qory men Nur Otan partııasynyń demeýshilik qarajaty esebinen muqtaj adamdarǵa azyq-túlik sebetteri men sanıtarlyq-gıgıenalyq qorjyn túrinde de áleýmettik kómek kórsetilýde.

Búgingi kúni 5,5 myńǵa jýyq adam osyndaı sebetter men jıyntyqtardy alyp úlgergen. Olardyń qatarynda úıine baryp qyzmet kórsetýge muqtaj jalǵyzbasty zeınetkerler, 2019 jyldyń aıaǵynan AÁK alýshy, biraq 2020 jyldyń jańa talaptaryna sáıkes kelmeıtin azamattar, sonymen qatar, senim telefonyna habarlasqan basqa da muqtaj jandar bar.

Bul kómek naqty muqtaj adamdarǵa memleket basshysynyń tapsyrmalaryn oryndaý boıynsha qalalyq is-sharalar josparynyń 23-tarmaǵyna sáıkes kórsetiledi.

Elbasynyń bastamasymen qurylǵan «Birgemiz» qoǵamdyq qory halyqtyń áleýmettik osal tobyna jatatyn 23 myńnan astam adamǵa áleýmettik tólemderdi júzege asyrý úshin qarajat bólýdi josparlap otyr.

Osylaısha, 1-toptaǵy múgedekter, múgedek balany kútýmen aınalysatyn ata-analar sııaqty kómekke zárý jandar «Birgemiz» qorynan jáne 2 AEK mólsherindegi tólemder sekildi áleýmettik kómektiń birneshe túrin alady.

Tótenshe jaǵdaı kezinde jekelegen sanattaǵy adamdardy áleýmettik qamsyzdandyrý tártibi bekitilgen bolatyn. Búgingi kúni olarǵa keminde 2 AEK túrinde (5302 teńge) áleýmettik kómek kórsetildi.

Respýblıkalyq bıýdjet qarajatynan 43,8 myń adamǵa 244,1 mln teńge tólengen. Eńbek mınıstriniń buıryǵyna ózgertýler engizilýine baılanysty resmı túrde jumyssyz retinde tirkelgen 3-toptaǵy múgedekterge qosymsha 140 mln teńge 2 AEK mólsherinde tólem tóleý josparlanýda.

Tótenshe jaǵdaıdyń engizilýimen kirisin joǵaltqandarǵa áleýmettik tólem tóleý týraly memleket basshysynyń tapsyrmasy aıasynda qujattar qabyldaý, sondaı-aq túsindirý jumystary júrgizilýde.

Tabysynan aıyrylǵan 6 myńnan astam qala turǵyny Memlekettik áleýmettik saqtandyrý qorynan 1 ETJ mólsherinde (42,5 myń tg) áleýmettik kómek aldy. Jalpy, osy járdemaqyny alý úshin búgingi kúni 67 myńnan astam ótinish kelip túsken, qamtylǵan adamdardyń sany – 83 myń.

"Qamshy" silteıdi
Ilmek sózder: áleýmettik kómek

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir