Ansar Musahanov Elbasyǵa syılyqtan at-tonyn ala qashty

Esterińizde bolsa, áz analardyń Elordasy Astananyń, Elbasymyz Nursultan Nazarbaevtyń týǵan kúnine arnap, 73 metr syrmaq tikkenin habarlaǵanbyz. Ile-shala, QR Prezıdent ákimshiliginiń jetekshisi K.Másimovtyń, QR Mádenıet jáne aqparat mınıstri M.Qulmuhammedtiń, Astana qalasynyń ákimi I.Tasmaǵambetovtyń, Almaty oblysynyń ákimi A.Musahanovtyń, «Nur Otan» partııasy tóraǵasynyń orynbasary B.Baıbektiń nazaryna hat jazǵanbyz(http://abai.kz/node/39957).

Osy aptanyń basynda sheberler otbasyna bas suqqan Almaty oblysy ákiminiń orynbasary Serik Muqanov pen Tekeli qalasynyń jańa ákimi Talǵat  myrzalar mańdaıy tership otyryp, mundaı baǵaly dúnıege tańdaılaryn qaqqan eken.  Tipti Gınnestiń rekordtar kitabyna jazylatyn osyndaı eńbekti  Elordaǵa Almaty oblysynyń atynan jetkizý kerektigin de eskertken.

Endi mine, 1 jyl boıy kóz maılaryn taýysqan analar eńbegi esh keteıin dep otyr. Osyǵan oraı Almaty oblysy ákiminiń orynbasary Serik Muqanovqa habarlasqanymyzda, «Syrmaqty ózimiz Elbasyna tapsyramyz. Biraq sheberler barmaıdy» degen bolatyn. Jańa ǵana telefon shalyp uǵyssaq, ákim-qaralar Elbasyǵa arnalǵan syılyqty Tekeliniń bir buryshyna jasyra turýdy jón kóripti. Memleket basshysy Almaty oblysyna ózi kelmeıinshe, biz aparyp bere almaımyz deıtin kórinedi.

Qudaı-aý, bir jyl boıy kóz maılaryn taýysyp, qaltalarynan qarajatyn shyǵaryp, qazaq eliniń basshysyna arnap tigilgen dúnıeni Elordasyna jetkizýge qaýqary jetpese, oblys ákimi ne istep otyr? Eger jetkize almasa, sheberlerge tıisti aqysyn tólep nemese el súıinetindeı syı jasasa eshkim qolyn qaqpaıtyn shyǵar?

Shyndap kelgende, Elbasynyń kózine túsip qalýda júrek aınıtyn ártúrli qıturqy dúnıelermen emes, osyndaı ulttyq qolónerge qoldaý kórsetýden bastasa kim qoı depti?

Urpaqqa úlgi, Elbasyna maqtanysh, Almaty oblysyna abyroı áperetin osyndaı ıgi jumys qandaı baǵaǵa da laıyq emes pe? Tipti, álemdik baspasóz Qazaqstan sheberleri memleket basshylarynyń týǵan kúnine aıryqsha syı jasady dep áspettemeı me?

«Biz keler jyly 100 metr tigemiz» dep edi bir sózderinde qos sheber. Ulyqtardyń mynandaı rýhsyzdyǵynan soń ne aıtamyz?

Masa.kz