Darıǵa Nazarbaeva qazaqstandyqtarǵa úndeý joldady

Qazaqstan parlamenti senatynyń tóraǵasy Darıǵa Nazarbaeva elde tótenshe jaǵdaı jarııalanǵanyn baılanysty qazaqstandyqtarǵa úndeý jasady. 

"Elimizdiń prezıdenti Q.Toqaev engizgen tótenshe jaǵdaı - ýaqytyly jáne qajetti shara. Bizdiń ortaq maqsatymyz - koronavırýs ınfeksııasynyń taralýymen kúresý, onyń Qazaqstan ekonomıkasyna jáne adamdardyń ómirine teris yqpal etýiniń aldyn alý. Barlyq memlekettik qyzmetter, ákimdikter azamattardyń qaýipsizdigin qamtamasyz etýge jáne halyqty barlyq qajetti zattarmen úzdiksiz qamtamasyz etý máselesin sheshýge jumyldyrylǵan. Qazirgi ýaqytta medısına qyzmetkerlerine barynsha kómek pen qoldaý kórsetý qajet - olar osy aýrýmen kúrestiń aldyńǵy qatarynda, adamdardyń ómiri men densaýlyǵy olardyń kásibıligi men jaýapkershiligine baılanysty" dedi Nazarbaeva.

Onyń sózinshe, quqyq qorǵaý organdarynyń áreketterine jáne tótenshe jaǵdaılar kezindegi azamattardyń tártibi men qaýipsizdigin qamtamasyz etý qajettiligine baılanysty shekteýlerge túsinistikpen qaraǵan jón. Al memlekettik organdardyń mindeti – pandemııa jáne onymen kúresý boıynsha júrgizilip jatqan sharalar týraly aqparattyń barynsha ashyqtyǵy men senimdiligin qamtamasyz etý.

"Úreıli kóńil kúı, qaýeset pen jalǵan aqparat taratýǵa úzildi-kesildi toqtaý salý kerek. Dúrliktirýshiler men arandatýshylar – koronovırýstyń ózi sııaqty bizdiń dushpanymyz. Pandemııamen kúresýdegi bizdiń ortaq jetistigimiz, birinshi kezekte, búkil qoǵamnyń, elimizdiń barlyq azamattarynyń, bizderdiń, qazaqstandyqtardyń jaýapkershilik ustanymyna baılanysty. Tynyshtyqty, tártipti, gıgıenany saqtaý, oqshaýlaný, ózińizge jáne jaqyn adamdaryńyzǵa qamqorlyq jasaý - vırýspen kúresýdiń basty quraly. Búgin bárimizge yntymaqtastyq jáne ózara jaýapkershilik pen kómek qajet. О́zińizdi jáne jaqyn adamdaryńyzdy kútińizder. Bárimiz birge jeńemiz!" dedi senat spıkeri. 

Buǵan deıin Qazaqstan prezıdenti Qasym - Jomart Toqaev Dúnıejúzilik densaýlyq saqtaý uıymynyń jańa COVID-19 koronavırýsyn "pandemııa" dep jarııalaýyna baılanysty elde 2020 jyldyń 16 naýryz saǵat 8.00-den bastap, 2020 jyldyń 15 sáýir saǵat 7.00-ge deıin tótenshe jaǵdaı engizgen.

Sońǵy aqparat boıynsha, Qazaqstanda 13 adamnan koronvırýs tabyldy. Olardyń 11-i Almatyda, ekeýi Nur-Sultanda aýrýhanada jatyr. Budan bólek, elde 2000-nan astam karantınde.