Beıbit jıyndar týraly zańda jıyn ótkizý týraly aldyn ala eskertý qaǵıdaty bolýy kerek. Bul týraly Qazaqstan  prezıdenti Qasym-Jomart Toqaev óziniń Twitter paraqshasynda jazdy.

Toqaevtyń sózinshe, beıbit jıyndar arnaıy belgilengen jerlerde ótýge tıis.

"Beıbit jıyndar týraly zańda jıyn ótkizý týraly aldyn ala eskertý qaǵıdaty bolýy kerek. Qoǵamdyq tártip pen qaýipsizdikti qamtamasyz etý úshin uıymdastyrýshylar jıynǵa qatysatyn azamattardyń sany jóninde bılikti habardar etýge mindetti. Beıbit jıyndar arnaıy belgilengen jerlerde ótýge tıis. Konstıtýsııaǵa qaıshy keletin urandarǵa jol berilmeıdi" dep jazdy prezıdent. 

Toqaev beıbit jıyndar  týraly ótken jyly jeltoqsanda óziniń bastamasymen qurylǵan Ulttyq qoǵamdyq senim keńesiniń ekinshi otyrsynda da aıtqan bolatyn. Prezıdent sol kezde Konstıtýsııa talaptaryna sáıkes Qazaqstan mıtıng ótkizýdiń "eskertý" formasyna kóshý keregin jáne "Beıbit jıyndar týraly" jańa zań jobasy jasalǵanyn málimdegen. 

Al 26 aqpanda Nur-Sultanda beıbit jıyndar týraly jańa zań jobasyna qatysty qoǵamdyq tyńdaýǵa qatysqandardyń keıbiri jobany qoldap, sherýdi arnaıy belgilengen orynda ótkizý durys dedi. Keıbiri beıbit sherý ótkizý úshin bıliktiń ruqsaty qajet emes, onyń ótetinin eskertse ǵana jetkilikti dedi. Tyńdaýǵa qatysqan belsendiler ózderin beıbit jıynda ustap kete beretinin, tipti úıden shyǵa almaıtyndaryn aıtyp, bul jobanyń qabyldanýyna qarsy shyqty.

Qazaqstanda sońǵy jyldary bılikke qarsy beıbit jınyndar men qarsylyq aksııalary jıi ótip júr. Kóbine mundaı jıyndarda "Oıan, Qazaqstan", "Shal, ket!" degen urandar aıtylady. Bılik oǵan qatysqandardy ustap, ákimshilik jazaǵa tartýmen keledi. Sońǵy ret mundaı qarsylyq aksııalary 25 aqpanda qoǵam belsendisi Dýlat Aǵadildiń Nur-Sultandaǵy tergeý abaqtysynda qaıtys bolǵanynan keıin ótti. 

Qoǵam belsendileri men saıası uıymdar 1 naýryzda da Dýlat Aǵadildiń ólimine baılanysty bılikke qarsy beıbit mıtıngige shyǵatyndaryn málimdedi. Olardyń arasynda 2019 jyly prezıdent saılaýynan keıin qurylǵan Respýbılka qozǵalysy, ózderin "bılikke qarsy oppozısııalyq uıymbyz" dep esepteıtin "Dempartııa" jáne tirkelmegen "Kóshe" partııasynyń belsendileri bar. 

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir