Almaty qalasynyń ákimi Baqytjan Saǵyntaev megapolıs turǵyndarymen ótken eseptik kezdesýde shaharda áleýmettik mańyzy bar qoǵamdyq kólikterdiń baǵyttary ákimdikpen qosymsha sýbsıdııalanatynyn málimdedi.

– Bizdiń sýbsıdııalaýdaǵy basty maqsatymyz – jol júrý tarıfteriniń ósýine jol bermeý. Sondyqtan 2021-2022 jyldarǵa biz usynǵan esep boıynsha ortasha tarıfpen 154 áleýmettik baǵyttarǵa 200 teńge kólemindegi sýbsıdııa 47,4 mlrd tg quraıdy, – dedi qala ákimi B. Saǵyntaev.

2019 jyly sýbsıdııa 23,1 mlrd tg qurady. 2020 jylǵa 24,2 mlrd tg bólindi. Onyń ishinde jeńildetilgen sanattaǵy jolaýshylar úshin tikeleı ótemaqy 4 mlrd tg qurady (2019 jyly – 5,3 mlrd tg).

Almatyda qoǵamdyq kólikti jańǵyrtý jumystary qarqyn aldy. 2019 jyly 450 jańa avtobýs satyp alyndy. Barlyǵy qaladaǵy avtobýs parki 92%-ǵa jańartyldy.

2020 jylǵa 401 avtobýs satyp alý josparlanǵan. Bıylǵy jyldan bastap qalada kóbinese gazben júretin elektroavtobýstardy satyp alýǵa kóńil bólinbek. 2019 jyly alǵashqy 10 elektroavtobýs iske qosyldy. Bul qala ekologııasyna zııan tıgizbeýge, sondaı-aq qala turǵyndarynyń jaılylyǵy men mobıldiligin arttyrýǵa múmkindik berdi.

Sonymen birge jolaýshylar tasymalyn sýbsıdııalaý somasy da artady. Almatydaǵy qoǵamdyq kólikterde jol júrýdiń ortasha quny 200 teńgeni quraıdy, onyń 80 teńgesin jolaýshylar tóleıdi. Aıyrmashylyq qalalyq bıýdjet esebinen óteledi. Sonymen qatar, bıýdjetten qala turǵyndarynyń jeńildigi úshin jolaqy sýbsıdııalanady (oqýshylar, stýdentter, múgedekter úshin).

Halyq sanynyń ósýine jáne qala aýmaǵynyń keńeıýine baılanysty marshrýttyq jelini ońtaılandyrý boıynsha jumystar belsendi júrgizilýde.

Qalanyń marshrýttyq jelisi 5 myńnan astam shaqyrymdy quraıdy. О́tken jyly turǵyndardyń ótinishi boıynsha 14 jańa baǵyt ashyldy. Onyń 8-i qala syrtyna baǵyttalady. Bul marshrýt jelisi qalanyń ortalyq bóligin shetki aımaq jáne oblystarmen baılanystyrýǵa múmkindik beredi. Mysaly, Boraldaı aýylyn Almaty-1 temirjol vokzalymen qosatyn №10 marshrýt iske qosyldy. Kóliktik qyzmet kórsetý syıymdylyǵy ortasha avtobýstarmen júrgiziledi.

2020 jyly kún saıyn 291 avtobýs shyǵatyndaı 24 qalalyq jáne qala mańyndaǵy marshrýttar ashý josparlanǵan.

Sondaı-aq, «Almaty – Qapshaǵaı» qala mańy marshrýtyn uıymdastyrý máselesi qarastyrylýda.

Bul sharalar ortasha jolaýshylar aǵynyn kúnine 850 myńnan 1,2 mln. adamǵa deıin ulǵaıtýǵa múmkindik berdi. Sonymen qatar, QTJ UK AQ-men Almaty oblysynyń jaqyn qalalaryna elektr poıyzdaryn iske qosý jobasy ázirlenýde. Bul qaladaǵy kiris joldaryna túsetin júktemeni azaıtýǵa, qala mańyndaǵy eldi-meken turǵyndarynyń mobıldiligin arttyrýǵa múmkindik beredi.

Metropolıten jelileriniń qurylysy qoǵamdyq kólik máselelerin sheshetin mańyzdy baǵyttardyń biri. Búginde 9 stansa jumys isteýde. Jeli uzyndyǵy 10,3 shaqyrymdy quraıdy. Elektropoıyzdardyń 7 quramy bar. Jolaýshylardyń ortasha aǵyny táýligine 45-50 myń adam. Sondaı-aq uzyndyǵy 3,1 shaqyrym bolatyn «Saryarqa» jáne «Dostyq» stansalarynyń qurylysy Abaı dańǵyly boıymen batys baǵytta jáne Altynsarın dańǵylynan Momyshuly kóshesine deıin jalǵaspaq.

Atalǵan stansalardy 2021 jyldyń sońyna qaraı paıdalanýǵa berý josparlanýda. Jeliniń bul ýchaskesi qalanyń tynysh aýdandaryn isker ortalyqpen baılanystyrýǵa múmkindik beredi. Al jolaýshylardyń josparly aǵyny táýligine 86 myń adamdy quraıdy.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir