Máýlen Áshimbaev: «Rýhanı jańǵyrý» baǵdarlamasyn júzege asyrýda jastar tárbıesine basymdyq berilýi tıis

QR Prezıdenti Ákimshiligi basshysynyń orynbasary Máýlen Áshimbaev «Rýhanı jańǵyrý» baǵdarlamasyn júzege asyrýda jastarǵa tárbıe berýge basymdyq berilýi kerektigin aıtyp, pikir bildirdi, dep habarlaıdy Qamshy.kz aqparat agenttigi QazAqparattyń deregin negizge alyp. 

««Rýhanı jańǵyrý» baǵdarlamasyn júzege asyrýda bizde naýqanshylyqtyń bolyp jatqanyn jasyryn emes. Ony aıtýymyz kerek. Árıne, rýhanı salada óńirlerde kóp sharýa atqarylady. Biraq sonyń bárin baǵdarlama aıasynda jasaı berý de shart emes shyǵar. Sondyqtan Dáýren Áskerbekuly (Abaev – avt.) aıtqandaı, bul turǵyda sannan sapaǵa kóshý kerek. Mınıstrdiń sharany qysqartaıyq, ár shara sapaly túrde júzege asyrylýy tıis degen bastamasyn tolyqtaı qoldaımyz», - dedi ol Aqordada «Rýhanı jańǵyrý» baǵdarlamasyn iske asyrý jónindegi ulttyq komıssııa otyrysynda.

QR Prezıdenti Ákimshiligi basshysynyń orynbasarynyń aıtýynsha, «Rýhanı jańǵyrý» baǵdarlamasyn júzege asyrýda jastar tárbıesine basymdyq berilýi tıis.

«Jastarǵa durys bolyńdar deı bergennen nátıje shyǵa ma degen suraq bar. Tólen aǵamyz durys aıtty: jastardy tárbıeleý úshin durys qundylyqtardy qalyptastyrý kerek. Sol sebepti osy baǵdarlama aıasynda durys qundylyqtar máselesin jıi kótersek, osyǵan basymdyq bersek – Elbasynyń strategııalyq baǵdarlamasynyń júzege asyrylýyna úlken bir úles bolady dep qabyldaımyn. Osy turǵydan kelgen kezde durys qundylyqtardy ne qalyptastyrady? Eń birinshiden, kórkem týyndylar, teleserıaldar, fılmder, kitaptar men jaqsy leksııalar kerek. Sondyqtan, bıyl da, keler jyldarda da kórkem týyndylardyń sapasyna kóbirek kóńil bólý kerek sekildi. Mysaly, alda ál-Farabı týraly da, Abaı jaıly da fılmder túsiriledi. Osyndaı týyndylardyń bárin pysyqtap, kerek bolsa komıssııada talqylap alýymyz kerek», - dedi ol.

Máýlen Áshimbaev Abaı jaıly fılm nemese teleserıal túsirsek, «tolyq adam» konsepsııasyn túsindirerlik deńgeıde eńbek jasalýy tıis. «Osy máselege memlekettik komıssııa kóbirek kóńil bóletin bolsa, Elbasynyń baǵdarlamasynyń júzege asyrylýyna kóp úlesin qosar degen úmittemiz», - dedi ol.

Eske sala ketsek, Memlekettik hatshy Qyrymbek Kósherbaevtyń tóraǵalyǵymen Aqordada búgin QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııanyń otyrysy ótkizildi.