Jórgekpul, járdemaqy, shákirtaqy ósedi. Búginnen bastap Qazaqstanda ne ózgerdi?

Járdemaqy

Tyshqan jylynda kópbalaly otbasylarǵa arnalǵan áleýmettik kómektiń jańa túri usynylmaq.

Otbasylyq tabys eskerilmesten 4 balasy bar otbasylarǵa 42 500 teńge, 5 balaǵa – 53 125 teńge, 6 balaǵa – 63 750 teńge, 7 jáne odan da kóp balalarǵa 74 375 teńge tólenedi.  

2020 jyly ataýly áleýmettik kómekti berý de jalǵasyn tabady. Eskere ketetini, memleket atalmysh járdemaqyny taǵaıyndaýda otbasylyq tabysty eseptep, osy arqyly járdemaqyny shynaıy muqtaj azamattardyń ǵana alýyn qamtamasyz etpek. Bul úshin eńbekke qabiletti otbasy múshesine jumys usynylady. Jumystan bas tartqan jaǵdaıda, AÁK tólemi tutas otbasy úshin toqtatylady. 

Bala dúnıege kelgende beriletin jórgekpul kólemi de artpaq. Birinshi, ekinshi jáne úshinshi bala úshin 100 766 teńge, tórtinshi balaǵa 167 076 teńge tólenedi. 

2020 jyly eń tómengi eńbekaqy mólsheri (42 500 teńge) ózgerissiz qalada.

Zeınetaqy

Memlekettik bazalyq zeınetaqy mólsheri bes paıyzǵa artyp, 16 839 teńge, zeınetaqynyń eń tómengi mólsheri 38 636 teńge bolady. 

Jalaqy

1 qańtardan bastap muǵalimderdiń jalaqysy 25%-ǵa, mádenıet salasyndaǵy qyzmetkerlerdiń eńbekaqysy 35%-ǵa, keıbiriniń jalaqysy 50%-ǵa deıin, áleýmettik sala qyzmetkerleriniń eńbekaqysy 30-60%-ǵa deıin artady.

Júrgizýshilerge qulaqqaǵys

Qazaqstanda benzın baǵasy qymbattaıdy. Otandyq munaı óńdeý zaýyttarynda óndiriletin janar-jaǵarmaı baǵasy tonnasyna 10 500 teńgeden 24 435 teńgege artpaq. Bul janarmaı quıý beketterinde benzınniń 10 teńgege qymbattaýyna soqtyrady. Jınalǵan qarajat áleýmettik jobalardy, onyń ishinde ataýly áleýmettik kómekti qarjylandyrýǵa jumsalmaq.

Sondaı-aq mas kúıinde jol-kólik oqıǵasyna ushyrap, eki nemese odan da kóp adamnyń ólimi tirkelgen jaǵdaıda júrgizýshini 7 jyldan 10 jylǵa deıin bas bostandyǵynan,  ómir boıyna kólik aıdaý quqyǵynan aıyrýdy kózdeıtin zań kúshine enbek.

Nesıe

1 qańtardan bastap aılyq tabysy kúnkóris deńgeıinen tómen, ıaǵnı 31 183 teńgeden az tabatyn azamattarǵa nesıe berilmeıdi. Zańǵa sáıkes kredıt beretin barlyq sýbektter – lombardtar, shaǵyn qarjy uıymdary jańa normany ustanýy tıis. Sondaı-aq kepilsiz nesıelerdiń tólenbegenine 90 kún tolǵanda, ósimpul, komıssııa qosylýy toqtatylady.

Shákirtaqy

Stýdentter shákirtaqysy 25 paıyzǵa artady. Ol úshin respýblıkalyq bıýdjetten 18 mlrd teńge kóleminde qarjy qarastyrylǵan.