19 Qarasha, 2019 Aımaqtar
«Rýhanı jańǵyrý» baǵdarlamasy aıasynda Jambyl oblysynda kóptegen ıgi jumystar júzege asyrylýda. Ásirese, aýyldan túlep ushyp, jetistikke jetken azamattardyń týǵan jerin umytpaı, ósken mekenine túrli syı-sııapat jasaýy kóptiń qoldaýyn tapty. Osy rette, jýyrda Qazaqstan sýretshiler odaǵynyń múshesi, qordaılyq qylqalam sheberi О́jet Núsipbaev Qarasaı aýylyndaǵy qazaq mektebine óziniń jańa týyndysyn tartý etti. Bul – dańqty baba Qarasaı batyrdyń maıly boıaýmen salynǵan beınesi.
О́jet Qazykeulynyń shyǵarmashylyǵy qordaılyqtarǵa kópten málim. Balalyq shaǵy Almalynyń tumsa tabıǵaty aıasynda ótken oǵan sýretshilik óner anasynan daryǵan. Ýázıpa ana on saýsaǵynan óneri tamǵan ismer, qolynan qaıshysy túspeı, búkil aýyldyń tekemet, syrmaq, tuskıizderine kózben-aq mólsherlep nebir ǵajap oıý-órnekterdi syzyp shyǵatyn edi. О́jet 1970 jyly Frýnzedegi kórkemsýret ýchılıshesin úzdik bitirip shyqty da, sodan beri júregi qalaǵan kásibinen qol úzgen joq. Sýret óneriniń jıvopıs, grafıka, terige bederlep beıne salý túrlerimen aınalysty. Únemi jańa obrazdar somdaýmen tyń izdenis ústinde júredi. Onyń qazirgi týyndylarynan ómirdiń máni týraly salmaqty oılar ańǵarylady. Basty taqyryby «Uly dala», álemdegi máńgi qozǵalys pen bitispes tartys. «Uly dalanyń sımvoly», «Dala nyshany», «Jyl qustary», «Máńgúrt», «Túrli-tústi álem» t.b. ataýlarynan-aq sýretshiniń aıtar oıyn bilýge bolady. Onyń ár jyldarda Almaty, Bishkek, Taraz qalalarynda taqyryptyq kórmeleri ótken, birqatar týyndylary Túrkııa, Qytaı, Japonııa, Almanııa, Grekııa tárizdi shetelderde jeke kolleksııalarda qoıylǵan. Ásirese, Tarazdyń 2000 jyldyǵyna, Qazaq handyǵynyń 550 jyldyǵyna jáne «Rýhanı jańǵyrý» taqyrybyna arnaǵan «Jibek joly», «О́rkenıettiń damýy», «Halyqtyń rýhanı qazynasy» tárizdi shyǵarmalary da kórermender men ónertanýshylar tarapynan joǵary baǵasyn aldy.
О́jet Qazykeulynyń qylqalamynan áli de nebir ǵajaıyp týyndylar jasalýda. О́tken jyly «Rýhanı jańǵyrý» baǵdarlamasy aıasynda Qarasaı aýyldyq ákimdiginiń uıymdastyrýymen ótken aýyl túlekterimen bolǵan kezdesýge barǵanda jańa salynǵan «Alaman báıge» kartınasyn tartý etti. Jerlesteri de qarap qalmaı, munyń ıyǵyna shapan jaýyp qurmettedi. Sol kezdesýde ózi bala kezde bilim alǵan baıyrǵy qazaq mektebiniń ujymy bilim ordasyna Qarasaı batyrdyń úlken sýretin salyp berýdi ótingen edi. Mine, jerlesteriniń bul tapsyrysy da sátimen oryndaldy.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir