Bilim báıgesinde baq synady

T. Rysqulov aýdany ákimdigi bilim bóliminiń uıymdastyrýymen Álıhan Bókeıhanov atyndaǵy orta mektepte «IQanat» olımpıadasynyń aýdandyq kezeńi bolyp ótti. «IQanat» olımpıadasy qabiletti oqýshylardy anyqtaý, zııatkerlik bastamalaryn jandandyrý jáne shet memleketter men Qazaqstan Respýblıkasyndaǵy joǵarǵy oqý ornyna túsý granttarynyń ıegeri atanýyna qoldaý kórsetý maqsatynda uıymdastyryldy.

Aýdan mektepteriniń 9 synyp oqýshylary arasynda uıymdastyrylǵan «IQanat» olımpıadasynyń aýdandyq kezeńi «IQanat» olımpıadasyn uıymdastyrý jáne ótkizý týraly» Erejesine saı «Erýdıt» esse konkýrsy, matematıka, fızıka, aǵylshyn tili pánderinen ótkizildi.

Bul joba tek aýyl mektepterindegi qabiletti oqýshylardy anyqtap, shet memleketter men Qazaqstan Respýblıkasyndaǵy joǵary oqý oryndaryna túsý granttarynyń ıegeri atanýyna zor múmkindik beredi. Joba III kezeńnen turady: aýdandyq, oblystyq, respýblıkalyq.

Respýblıkalyq kezeńiniń jeńimpazdary atanǵan oqýshylar onlaın rejıminde oqytý platformasy arqyly joǵary oqý oryndarynyń qabyldaý emtıhandaryna daıyndala alady.

Atalmysh olımpıadaǵa aýdan mektepteriniń 403 úzdikteri qatysyp baq synasty. «IQanat bilim qory» qoǵamdyq qorynyń aımaqaralyq koordınatory Tolqyn Nartaeva olımpıadany ashyp berip, olımpıadanyń ótilý barysyna toqtaldy. Aýdannyń mereıin asqaqtatar úmitkerlerge shalqar shabyt pen tolaǵaı tabystar tiledi.

Aýdandyq bilim bóliminiń ádistemelik kabınetiniń meńgerýshisi Dáýrenbekova Raýshan О́skenqyzy «Daryn jeke jetilmeıdi, daryndar saıysa júrip, birin-biri jeteleıdi» degendeı, oqýshylardyń alǵan bilimderi men daǵdylaryn is júzinde sarapqa salatyn jaýapty kún ekendigin aıta kele, úmitkerlerge ǵylym men bilim jolynda bıikke samǵaýlaryna tilektestigin bildirip, olımpıadanyń ótýine qoldaý kórsete otyryp, jobanyń tıimdi tustaryn atap ótse, mektep dırektory Nýrgýl Shýlakova ótken kúnniń úzigi men keler kúnniń úmitin jalǵar balalarymyzdyń ǵumyrynyń uzaq bolyp, Qazaqstannyń bolashaǵyn kórkeıter azamattar bolyp ósetinine senim bildirip, olımpıada qatysýshylaryna sáttilik tiledi.

Áýelete shyrqalǵan án men qazaqy dombyranyń kúmbirlete tógilgen kúmis úni olımpıadanyń saltanatty ashylýynyń ajaryn asha tústi. Taraz qalasy «Silk way star» halyqaralyq baıqaýynyń bas júlde ıegeri Serik Azamat «Qazaq eli» ánin jáne respýblıkalyq «Jas juldyz» televızııalyq baıqaýynyń bas júlde ıegeri Serikbaı Arsen «Jasa, Qazaqstan» ánin shyrqasa, «Mektep» ansambli Qurmanǵazynyń «Balbyraýyn» kúıin pash etti.