"Shekara buzdy" dep aıyptalǵan qytaı qazaǵy Qaısha Aqan soty jalǵasty

Búgin, 12 qarashada Jarkent qalasyndaǵy Panfılov aýdandyq sotynda Qazaqstan–Qytaı shekarasynan zańsyz ótken Qytaı qazaǵy Qaısha Aqan isi boıynsha sot prosesi jalǵasty dep jazady Qamshy.kz aqparat agenttigi Azattyqtyń deregin negizge alyp. 

Sotqa Qaısha Aqannyń advokaty Aıman Omarova, AQSh-tyń Almatydaǵy konsýldyǵynyń, "Ata jurt", "Otandas el" uıymynyń ókilderi qatysty.

Qaısha Aqannyń sottaǵy sózine qaraǵanda, ol Qazaqstan shekarasynan 2018 jyldyń 7 mamyrynda Qorǵas keden beketi arqyly, kópshilikke ilese ótken.

2019 jyly tamyz aıynda ulttyq qaýipsizdik komıtetine óz erkimen baryp, shekaradan zańsyz ótkeni jaıly habarlaǵan. Artynsha qylmystyq is qozǵalyp, sot bastalǵan.

Ol Qazaqstanǵa kelgen sátte taǵy bir etnıkalyq qazaq Saıragúl Saýytbaıdyń isi boıynsha sot prosesin qadaǵalaǵanyn aıtady. О́z taǵdyryn Saıragúl Saýytbaı taǵdyrymen uqsastyrady. Onyń sózinshe, Qytaıdyń Ile-Qazaq avtonomııalyq aýdanynyń polısııasy "qaıta tárbıeleý lagerine" qamalatynyn ashyq eskertken. Osydan keıin Qazaqstanǵa ketýge bel baılap, Qytaı shekarasyna úsh ret kelgen.

–Qolymda Qazaqstannyń vızasy bola tura jibermedi. Shetelge shyǵýǵa tyıym salynǵandar tizimindesiń dep qaıtardy. Qazaqstannan pana izdep keldim. Meni Qytaıǵa qaıtarmaýdy suraımyn. Qytaıda meni saıası qýǵyn kútip tur,- deıdi ol.

Qaısha Aqan sot barysynda "Qazaqstan shekarasynan zańsyz ótkenin" moıyndap, oǵan Qytaıdaǵy az ulttarǵa jasalatyn qysymnan seskengendikten barǵanyn aıtty.

1983 jyly Qytaıdyń Ile-Qazaq avtonomııaly oblysynda dúnıege kelgen qazaq Qaısha Aqan Qytaıda 70 jastaǵy sheshesi qalǵanyn aıtady. Jalǵyz uly da buryn ajyrasqan kúıeýiniń qolynda, Qytaıda qalǵan. Qazir Almaty qalasynda páter jaldap turady, turaqty jumys istemeıdi.

О́ziniń aıtýynsha, qarashanyń 11-ine Almaty qalalyq kóshi-qon polısııasynan "Pana izdeýshi tulǵa" qujatyn alǵan.

2018 jyly "Qazaqstan shekarasynan zańsyz ótti" degen aıyppen Qytaı qazaǵy Saıragúl Saýytbaıdyń ústinen sot prosesi júrgen. Qoǵam nazaryn aýdarǵan sot sheshimimen Saıragúl Saýytbaı shartty jazamen bostandyqqa shyǵyp, keıin Shvesııadan saıası baspana alyp ketken.

Buǵan deıin Qytaıdyń Shyńjań-uıǵyr avtonomııalyq aımaǵynda turatyn etnıkalyq qazaqtar Qaster Mushanuly men Murager Álimulynyń Qazaqstanǵa "shekaradan zańsyz ótkeni", týraly aqparat taraǵan bolatyn. "Pana izdeýshi tulǵa" mártebesin alǵan olardyń ústinen qazir tergeý prosesi júrip jatyr.