Almatynyń densaýlyq saqtaý júıesi qalaı ózgeredi?

Almaty qalasy ákiminiń orynbasary Erjan Babaqumarov prezıdent Q.Toqaevqa megapolıs turǵyndaryna kórsetiletin medısınalyq qyzmettiń sapasyn jaqsartýdyń sharalary týraly aıtyp berdi.

Almatyny damytý boıynsha ótken keńeıtilgen keńeste memleket basshysy qalanyń densaýlyq saqtaý salasynyń jumysyna kóptegen shaǵymdardyń túsetinin atap ótti. Onyń málimeti boıynsha, áleýmettik saýalnama qalalyqtardyń 63%-ynyń medısınalyq qyzmetke kóńilderi tolmaıtynyn kórsetken.

Densaýlyq saqtaýdaǵy korporatıvti basqarýdyń tómen deńgeıi atap ótildi. «Bul ashyqtyqtyń bolmaýyna, jemqorlyqqa ákeledi. Bul kórsetkish boıynsha Almaty 17-niń 16-shy ornynda tur», –  dedi prezıdent, qysqa merzimde jaǵdaıdy túzetýdi tapsyrdy.

E. Babaqumarov baıandaǵandaı, B. Saǵyntaevtyń Almaty ákimi bolyp taǵaıyndalǵan kúnnen bastap jumys qolǵa alyndy, onyń tapsyrmasy boıynsha quraldardyń sany men tehnıkalyq jaraqtanýǵa qatysty qalanyń barlyq medısınalyq uıymdaryna aýdıt júrgizildi.

«Densaýlyq saqtaý júıesi ákimdik jumysynyń basty baǵyttarynyń biri bolyp tabylady. Bizge túsken 45 myń ótinishtiń monıtorıngi medısınalyq qyzmet sapasynyń turǵyndardy tolǵandyratyn 10 saýaldar tobyna enetinin kórsetti», – dedi qala ákiminiń orynbasary.

Jalpy quny 60 mlrd. teńgeni quraıtyn qajetti quraldarmen qalanyń medısına uıymdaryn jabdyqtaý jónindegi úsh jyldyq jospar júrgizilgen aýdıttiń basty qorytyndysy boldy.

E. Babaqumarov qalalyqtardyń kórsetilgen qyzmet sapasyna kóńili tolmaıtyndyǵyn jańa yqshamaýdandardaǵy emhanalardyń joqtyǵymen túsindirdi, sonyń saldarynan ortalyq emhanalar shamadan tys tolyp, kezekter oryn alyp, dárigerlerge normatıvten tys júkteme túsken.

«Bul problemany sheshý úshin biz dárigerlik ambýlatorııalar júıesin damytýdyń úsh jyldyq josparyn ázirledik. Bizge barlyǵy 35 ambýlatorııa qajet, olardyń 7-i qazirdiń ózinde ashyldy, jyl aıaǵyna deıin taǵy 3-in ashamyz», – dedi qala ákiminiń orynbasary. Budan ózge, onyń málimeti boıynsha bıylǵy jyly 3 emhana, al keler jyly taǵy 3 emhana salynady.

Medmekemelerdi korporatıvti basqarýdyń tıimdiligin arttyrý maqsatynda qadaǵalaý keńesteri qurylǵan bolatyn. Alaıda olardyń quramynda emhanalar men aýrýhanalardyń birinshi basshylary bolǵandyqtan medısınalyq uıymdardyń jumys sapasyna oń yqpal ete almady.

«Osyǵan oraı konkýrstyq negizde 45 jańa qadaǵalaý keńesteri quryldy, bul barlyq uıymdardyń 60%-yn quraıdy. Qalǵandary boıynsha jumys jalǵasýda», – dep túsindirdi E. Babaqumarov.

Sonymen qatar qalada jekeshelendirý men MJÁ damytýdyń keshendi jospary ázirlenýde. Jalpy ádis anyqtaldy – kásibı emes aktıvterdi operasııalyq basqarýdan arylyp, jaǵdaıdy baqylaýdy saqtap qalý qajet. Qala biregeı medısınalyq mekemelerdi, shettegi emhanalardy jáne iri aýrýhanalardy basqarý quqyǵyn ózine qaldyrady.

Bulardan ózge, ınvestorlarmen jumys jandanatyn bolady, qyzmettiń ashyqtyǵy jáne sybaılas jemqorlyqqa qarsy kúres qamtamasyz etiledi. Bul rette sybaılas jemqorlyqqa qarsy qyzmetimen birge jobaly ofıstiń jumysy bastaldy.

Almaty ákiminiń orynbasary Memleket basshysyn densaýlyq saqtaý salasynyń jumysy jańa serpin alatynyna, aıtylǵan problemalardyń sheshiletinine sendirdi. Onyń ústine, Prezıdenttiń tapsyrmasyna sáıkes ósimniń jańa rezervterin anyqtaý maqsatynda bilim jáne densaýlyq saqtaý júıeleri bazasynda áleýmettik ekonomıka damıtyn bolady.

«Munda qyzmet kórsetýdiń jeke sektoryn qurý maqsatynda MJÁ tetikteri qoldanylady. Ol úshin bıýdjet esebinen salynǵan úılerdiń birinshi qabattary áleýmettik mańyzy bar nysandarǵa beriletin bolady», – dep qorytyndylady sózin E. Babaqumarov.