Moıynqumdyq sharýalar eginshilikke de bet burdy

Jeri mal sharýashylyǵyna qolaıly sanalatyn Moıynqum aýdanynda sońǵy jyldary sýarmaly egis alqaptaryn ulǵaıtý esebinen eginshilikke de bet burys baıqalady.Osylaısha moıynqumdyq jergilikti bılik ókilderi men sharýalar arasyndaǵy birlesken istiń nátıjesinde Memleket basshysynyń Qazaqstan halqy Joldaýynda aıqyndalǵan sýarmaly egis alqabyn 2030 jylǵa qaraı 3 mıllıon gektarǵa ulǵaıtý tapsyrmasy oryndala bastady, dep jazady Qamshy.kz aqparat agenttigi. 

Aýdandaǵy buryn júgeri, arpa aýyl sharýashylyq qurlymdarynyń jetekshileri, agronomdar men sý sharýashylyǵy mamandarynyń basyn bir arnaǵa toǵystyrǵan «Agroónerkásip keshenin damytý» jóninde komıssııa quryldy. Komıssııa aýdandaǵy sýarmaly egistik alqabyn ulǵaıtýda obyls ákiminiń bastamasymen qurylǵan «ASA-Talas» mekemesiniń múmkindigin paıdalanýdy jón kórdi.

–Sýarmaly egisti alqabyn ulǵaıtý sharalaryna kirispesten buryn Aıdarly, Birlik, Bınazar, Aıtbaıı Nazarbekov, Kókjelek, Kúshaman, Jambyl aýyldarynyń sharýalarymen pikirlestik. Olardyń aıtar ýáji jergilikti jerde aýyl sharýashylyǵyn damytýda sý jetispeıdi, tehnıka, tuqym tabylmaıdy degenge saıady.Osylaısha biz eń áýeli aǵyn sýdy jetkizý isine bel sheshe kiristik. Mehanıkalyq jasaqtyń tehnıkalarymen uzyndyǵy 70 shaqyrym 9 kanal tazalandy. Jeke ıeliktegi «Bınazar», «Birlik» kanaldary memlekettik menshikke qaıtarylyp alyndy. Aıdarly, Birlik, Bınazar aýyldarynda tyń jerlerge soqa tústi. Bul jumystarǵa aýdan bıýdjetinen 65 mıllıon 304 myń tenge qaralyp, oǵan aýyl sharýashylyǵy tehnıkalary satyp alyndy,–deıdi aýdan ákimi Máden Musaev.

Aýdan ákiminiń aıtýynsha aımaqtaǵy sýarmaly egistik alqaptaryn ulǵaıtý jumystary eń áýeli egistik jerlerdiń qazirgi jaǵdaıyn baǵamdaýdan bastalǵan.

–Aýdannyń aýmaǵyndaǵy egistik jerlerdi teksergenimizde olardyń kóbiniń qaraýsyz qalǵany anyqtaldy. Tipti tal-daraq basyp ketken alqaptar da kezdesti. Ara-tura ıesi anyqtalmaǵan egis alqaptary da boldy. Uzaq ýaqyt ıessiz qalǵan jerge sý jetkizýdiń múmkindigi azaıǵan. Biz osynaý alqaptardy esepke alyp, olarda tazalaý jumystaryn júrgize bastaǵanda sharýalarda senimdilik paıda boldy. Nátıjesinde biz bir ǵana júgeri alqabyn 1100 gektarǵa deıin ulǵaıta aldyq. Endi jerde «dala arýyna» oraq túspek. Buǵan deıin biz tary alqabynda kúzgi jıyn terimdi tabysty aıaqtaı alyp edik, – deıdi aýdan ákimi.