Kartop frıin óndiretin zaýyt salynady

2022 jyldyń qyrkúıeginen bastap Jambyl oblysynda kartop frıi óndirile bastaıdy. О́ńirde qolǵa alynǵan biregeı alyp joba aıasynda «Taraz hımııalyq parki» erkin ekonomıkalyq aımaǵynda keler jyldyń basynda dál osy ónim túrin óndiretin zaýyttyń qurylysy bastalady, dep jazady Qamshy.kz aqparat agenttigi. 

Bul jobany gollandııalyq Farm Frites kompanııasy qolǵa alýǵa nıet tanytyp otyr. Jyldam daıyndalatyn tamaq ónerkásibinde joǵary suranysqa ıe kartop frıin óndiretin bul kompanııa dál osy saladaǵy álemdegi eń úzdik 5 kompanııanyń biri sanalady. Osydan jarty ǵasyr buryn Gollandııa jerinde alǵashqy ónimin shyǵarǵan kásiporyn qazir tamaq ónerkásibindegi jahandyq jelini quraıtyn alpaýyttary «McDonalds» men «KFS»-di negizgi shıkizatpen qamtamasyz etýshi bolyp tabylady.

–Bizdiń kompanııa Táýelsiz Memleketter Dostastyǵy elderiniń keńistigine 9 jyl buryn kirdi. Birer jyl buryn Reseı jerinde jumys jasap kórdik. Al 2015 jyly bizge Qazaqstan Respýblıkasynyń Aýyl sharýashylyǵy mınıstrimen kezdesýdiń sáti tústi. Eki jaqty kelisimge saı biz kartop frıi úshin qajetti kartop surypyn Qazaqstannyń soltústik, ońtústik aımaqtaryna egip, synama aldyq. Onyń ishinde synamaly alqap Jambyl oblysyna da egildi. Nátıjesi jaman emes. Tipti joǵary ónimdilik kórsetti. Keıinnen ınvestor retinde bizge «Taraz hımııalyq parki» erkin ekonomıkalyq aımaǵynda jumys jasaý usynyldy. Biz bul usynysqa qýana kelisim berdik. Jergilikti bılik te bizdiń jobamyzǵa qyzyǵýshylyq tanytyp, ony júzege asyrýda qoldaý bildirip otyr. Qazirgi jospar boıynsha bizge zaýytty tolyq jumys qýatymen iske qosý úshin 10 myń gektar kartop alqaby qajet. Shıkizattyń osy kólemimen bizdiń kompanııa jylyna 70 myń tonna daıyn ónim shyǵara alady, –deıdi Farm Frites kompanııasynyń jobalyq dırektory Ios den Býr.

Oblys aýmaǵynda bul biregeı jobany júzege asyrýdyń barlyq múmkindik bar. Ári jergilikti bılik Farm Frites kompanııasynyń ınvestısııalyq tıimdiliginen buryn aýyl sharýashylyǵyn damytýdaǵy múmkindigin joǵary baǵalaıdy. О́ıtkeni bıyldyń ózinde oblysta 10 myń gektar alqapqa kartop egilgen. Al óńir sharýalary suranysqa saı kartop alqabyn ulǵaıtýǵa nıetti. Sondaı-aq oblystyq ákimdik bul zaýytqa qajetti mamandardy olardyń suranysyna saı memlekettik blim berý tapsyrysy arqyly daıyndaý múmkindigin de qarastyryp jatyr.

Al Farm Frites kompanııasynyń jobalyq dırektory Ios den Býr joba sátti iske asyrylǵan jaǵdaı zaýyttyń tek kartop frıin ǵana óndirmeı, joǵary surypty kartop tuqym sharýashylyǵynyń tájirıbelik alańyna aınalatynyn jetkizdi.