London soty "polıseıge shabýyl jasady" dep aıyptalǵan Aısultan Nazarbaevty bir jyl shartty jazaǵa kesti

London soty "polıseıge shabýyl jasady" dep aıyptalǵan Qazaqstannyń burynǵy prezıdentiniń jıeni Aısultan Nazarbaevty bir jyl shartty jazaǵa kesti dep habarlady 18 qazanda BBC arnasy.

Aısultan Nazarbaev – Darıǵa Nazarbaeva men Avstrııa túrmeleriniń birinde kóz jumǵan Rahat Álıevtiń uly. Ol - Ulybrıtanııa koroldiginiń «Sandherst» áskerı akademııasyn túlegi. Aısultan Nazarbaev oqýyn bitirip, Qazaqstanǵa oralǵan soń eldiń qorǵanys mınıstrliginiń barlaý basqarmasynda qyzmet etken. 2017 jyly jeti aıdaı Qazaqstan fýtbol federasııasy vıse-prezıdenti qyzmetin atqarǵan. Sońǵy bir jarym jyldaı ol jurt nazaryna shyqpaı ketken.

Maýsym aıynda Qazaqstannyń birinshi prezıdenti Nursultan Nazarbaevtyń jıeni, Darıǵa Nazarbaevanyń uly Aısultan Nazarbaev Londonda esirtkiniń kúshimen polısııa qyzmetkerlerine qarsylyq kórsetip, olardyń birin tistep aldy dep aıyptalǵan edi. Tergeý oryndarynyń dereginshe, polıseıdiń qolynda kádimgideı iz qalyp, qan aqqan.

 Nazarbaev esirtkiden emdelgen Priory emhanasynyń deregine sáıkes, naýqas dárigerlerdiń nusqaýlyǵyn muqııat oryndap, emdeý kezinde odan ilgerileýshilik baıqalǵan. Sýdıa sony eskerip, onyń túrmeden góri bostandyqta júrip emdelgeni durys bolady dep úkim shyǵarǵan. Nazarbaevtyń advokatynyń aıtýynsha, eks-prezıdenttiń jıeni "sot úkimin estigen soń aýyr júk moınynan túskendeı sezingen". Nazarbaevtyń ózi BBC-ge túsinikteme berýden bas tartqan. 

Sot oǵan 18 aı synaq merzimin bergen: eger bul ýaqyt aralyǵynda zań buzsa, shartty jaza túrme jazasyna aınalmaq. Sot úkimine sáıkes, ol 140 saǵat qoǵamdyq jumys isteýi tıis, esirtkige táýeldilikten arylý boıynsha 20 sessııaǵa qatysýǵa mindetti. Buǵan qosa, sot ony myń fýnt kóleminde (shamamen 1100 dollar) aıyppul tólep, 5000 fýnt kóleminde shyǵyndy óteýge mindettedi.