Jastarǵa jarqyn jol silteýde

Jastarǵa jarqyn jol silteý úshin paıdaly keńesterdiń de tıgizer áseri mol. Osyny eskergen Jambyl oblysy ákimdiginiń jastar saıasaty máseleleri basqarmasy QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Jambyl oblysy boıynsha departamentimen birlese otyryp, bıylǵy 27 mamyr - 4 shilde aralyǵynda oblystyq «Bolashaqqa baǵdar» atty kóshpeli keńes berý alańy jumysy aıasynda Taraz qalasynda, aýdandar men eldi mekenderde bolyp, barlyq sanattaǵy jastar men turǵyndarǵa keń aýqymdy túsindirý jumystaryn júrgizdi.

Jalpy, Taraz qalasy men aýdandar boıynsha keńes berý alańdaryna 8983 adam qamtyldy, onyń 5174-i jastar. Bul turǵyda 7687 adamǵa keńes berilgen. Atap aıtqanda bilim berý salasy boıynsha 2196, jumyspen qamtý baǵytynda 1082, «Dıplommen aýylǵa» baǵdarlamasy týraly 382, kásipkerlik turǵysynda 802, aýyl sharýashylyǵy sektorynda 361, din boıynsha 712, jer qatynastary salasynda 566, probasııa qyzmeti jaıynda 139, turǵyn úı alý úshin 837, memlekettik kirister týraly 220, quqyqtyq baǵytta 246, «Jas Otan» jastar qanaty boıynsha 144 adamǵa keńester berildi.

Basqarma tek keńes berýmen shektelmeı, jastardyń shyǵarmashylyǵyn damyýǵa da kóńil bólip keledi. Bul turǵyda baıqaýlardyń tıgizer paıdasy zor. Ústimizdegi jyldyń 7 maýsymynda «Balasaǵun» ortalyq konsert zalynda oblys ákimdigi jastar saıasaty máseleleri basqarmasy «Jastar resýrstyq ortalyǵynyń» uıymdastyrýymen oblystyń daryndy, talantty jastaryn qoldaý jáne tanytý maqsatynda HV oblystyq jastar Delfıılik oıyndary ótkizildi. Oblys aýdandary men Taraz qalasynan irikteý baıqaýlarynan ótip, oblystyq baıqaýǵa joldama alǵan 400-ge jýyq jas ónerpazdar 19 nomınasııa boıynsha saıysqa tústi. Konkýrs eki jas sanaty boıynsha: kishi top 10-15 jas jáne úlken top 16-25 jas aralyǵynda ótkizildi. Árbir nomınasııa boıynsha I, II jáne III oryn ıegerleri anyqtalyp, baǵaly syılyqtar men dıplomdar tabys etildi. HV oblystyq Delfıılik oıyndarynyń jeńimpazdary Ulttyq Delfıılik oıyndarǵa joldama aldy.Bul baǵyttaǵy jumystar aldaǵy ýaqytta da jalǵasa beretin bolady. Ásirese, jastardyń shyǵarmashylyǵyn shyńdaýǵa kóptep kóńil bólinbek.