"Úsh arysqa" eskertkish ornatylady

Elordada qazaqtyń úsh arysy – Sáken Seıfýllın, Ilııas Jansúgirov jáne Beıimbet Maılınge eskertkishter qoıylady.

Bul týraly Nur-Sultan qalasy ákiminiń orynbasary Baqtııar Máken "Meniń tilim – uly dala rýhy" HHI qalalyq til festıvalinde málim etti.

"Abaıdyń 175 jyldyq mereıtoıyna arnalǵan sharalar bastalyp ketti. Sonyń aıasynda tuńǵysh ret elordamyzda №87 Abaı atyndaǵy mektepti ashtyq. Ál-Farabıdiń 1150 jyldyǵyna oraı, onyń esimin Oqýshylar saraıyna berý josparlanǵan. Bıyl halyqaralyq deńgeıdegi Jazýshylar konferensııasy ótti. Sonyń aıasynda Abaı dańǵylynda Jazýshylar alleıasyn saldyq. Sol alleıada úsh arys – Sáken Seıfýllın, Ilııas Jansúgirov, Beıimbet Maılınniń 125 jyldyǵyna oraı eskertkishter ornatylady. О́zge de tulǵalardy ulyqtaý úshin bilim-ǵylym oshaqtaryna belgili qaıratkerlerdiń esimin berýdi jalǵastyramyz", – dedi qala ákiminiń orynbasary.

Aıta keteıik, "Til týraly" zańnyń qabyldanǵanyna 30 jyl tolýyna oraı, elordada memlekettik tildiń qoldanylý aıasyn keńeıtip, onyń ultaralyq qatynas quralyna aınalýyna sińirgen eńbegi úshin bir top til janashyry marapattaldy.

Aıjan Serikjanqyzy

QazAqparat