«Diniń tursyn din aman...»

Jambyl oblysynda Qazaqstan Respýblıkasynda dinı ekstremızm men terrorızmge qarsy is-qımyl jónindegi 2018 – 2022 jyldarǵa arnalǵan memlekettik baǵdarlamasyna saı destrýktıvti dinı aǵym ókilderiniń sanyn azaıtý jumystardy júıeli júrgizip keledi. Bul oraıda, quqyq qorǵaý, din isteri basqarmasy, din problemalaryn zertteý ortalyqtary men azamattyq qoǵam ınstıtýttary arasynda júıeli baılanys ornatylǵan, dep jazady Qamshy.kz aqparat agenttigi. 

Bul oraıda oblystaǵy barlyq aýdan turǵyndary arasynda teolog-mamandardyń qatysýymen «Din men dástúr sabaqtastyǵy», «Siz dinı saýattysyzba?» taqyryptarynda kezdesýler uıymdastyryp turady. Al birqatar aýdandarda memlekettik áleýmettik tapsyrys sheńberinde din salasyndaǵy ózekti máselelerge azamattyq qoǵam ınstıtýttaryn tartý tájirıbesi qalyptasqan.

–Máselen Jýaly aýdany men Taraz qalasy ákimdikteri úkimettik emes uıym ókilderin tarta otyryp, aımaqtaǵy din salasyndaǵy ótkir máselelerdi tereńnen zertteýde. Sondaı-aq munda bilikti teolog mamandardyń kómegimen destrýktıvti dinı baǵyttaǵy azamattardy ońaltý jumystary da óz nátıjesin berýde. О́tken jyly Taraz qalasynda teris dinı aǵymnyń jetegine ergen 5 azamat al Jýaly aýdanynda 3 azamat qoǵamǵa qaıta beıimdelgen. Bul jumystarda durys baǵyt baǵdar berýde din isteri basqarmasy men din problemalaryn zertteý ortalyǵynyń mamandary da aýdandarda issaparlarda bolyp, aqparattyq-túsindirý jumystary men ádistemelik kómekterdi turaqty túrde kórsetip keledi,–deıdi oblys ákimdigi din isteri basqarmasynyń basshysy Jangeldi Omarov.

Al Qazaqstan musylmandar dinı basqarmasynyń oblystaǵy ókili, «hıbatýla Tarazı» ortalyq meshitiniń bas ımamy Qanat Jumaǵul óńirde Qazaqstan Respýblıkasynda dinı ekstremızm men terrorızmge qarsy is-qımyl jónindegi 2018 – 2022 jyldarǵa arnalǵan memlekettik baǵdarlamasyn iske asyrýda ıslam dini salasynyń ókilderimen júrgizilgen jumystyń aýqymdylyǵyn alǵa tartady.

–Oblys aýmaǵynda teris aǵymda júrgen azamattarmen meshitterde 498 jalpy kezdesý jáne 109 jeke kezdesý ótti. Bul kezdesýlerge 24 988 adam qamtyldy. Solardyń ishinen 8 adam hanafıge oralsa, 28-i eki oıly kúıde qalyp otyr. Qazirgi tańda olarmen jumys jasalyp jatyr Sondaı Taraz qalasy men onyń aýmaǵynda ornalasqan 158/1, 158/2, 158/4, 158/5, 158/7 túzetý mekemelerinde jyl basynan beri 10 ımam jeke jáne jalpy kezdesýler ótkizdi. Bul jumystar túzetý mekemelerindegi teris aǵymdar júrgenderdi qoǵamǵa qaıta baýlý maqsatynda júrgizilip keledi, –deıdi Q.Jumaǵul.