Tynymsyz tirlik etseń ǵana, tabysqa kenelesiń

Memleket kásip ashyp, yrzyq tabýǵa yqylastylardy qashanda qoldap keldi, qoldaı da bermek. Prezıdent óz Joldaýynda shaǵyn, ásirese, mıkrobıznes elimizdiń áleýmettik-ekonomıkalyq jáne saıası ómirinde mańyzdy ról atqaratyndyǵyn atap ótip, ol eń aldymen, aýyl turǵyndaryna turaqty jumys berip, jumyssyzdyqty azaıtatyndyǵyn basa aıtqan bolatyn.

Aıta ketý kerek, bul turǵyda «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń isker azamattarǵa tıgizer paıdasy mol. Bıyl atalmysh baǵdarlama aıasynda Jambyl oblysy boıynsha osy jyly 11,6 mıllıard teńge, onyń ishinde respýblıkalyq bıýdjetten – 7,4 mıllıard, jergilikti bıýdjetten 4,2 mıllıard teńge bólinipti. Sondaı-aq 1 qyrkúıektegi málimet boıynsha jumyspen qamtýdyń belsendi sharalaryna 22906 adam tartylsa, onyń ishinde vakanttyq bos jumys oryndaryna – 8842 adam, qysqa merzimdi kásiptik oqýǵa – 3081 adam, áleýmettik jumys oryndaryna – 1440 adam, jastar praktıkasyna 2108 túlek joldanyp, aqyly qoǵamdyq jumystarǵa 4609 jumyssyz tartylǵan. Al 1208 adam «Bastaý-Bıznes» jobasymen kásipkerlik negizderine oqysa, «Jas kásipker» jobasy boıynsha 575 adam oqýǵa joldanypty. 597 adam shaǵyn nesıe alyp, kásip bastap ketken.

Sondaı qoldaýǵa ıe bolyp, óz kásibin dóńgeletip otyrǵan azamattardyń biri- Muratbek Nysanbekov.

Ol 2013 jyly Jýaly aýdanynyń ortalyǵy B.Momyshuly aýylynan óz kúshimen halyqqa eń qajetti tehnıkalyq jóndeý ortalyǵyn ashqan. Kólik sany kún sanap artyp kele jatqan qazirgi shaqta onyń ashqan ortalyǵyn keńeıtý qajettigi týyndaǵan. Árıne, myna zamanda qarjysyz sharýańdy tikteý múmkin emes. Sondyqtan jeke kásipker aýdandyq jumyspen qamtýdy jáne áleýmettik baǵdarlamalar bólimine qaıyrylypty. Ondaǵy mamandar kásipkerge «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy arqyly jeńildetilgen nesıe alýǵa múmkindigi bar ekendigin aıtqan. Osylaısha, oraıy kelip turǵan jeńildikten qaǵylǵysy kelmegen Muratbek Nysanbekov 2017 jyly 3 mıllıon teńge nesıe alyp, «Ásem» tehnıkalyq jóndeý ortalyǵyn qaıta ashypty. Sóıtip onda kórshiles Qytaı elinen jańa qondyrǵylar satyp ákelip, kólik jýý, motor jóndeý, dóńgelek túzetý, kompıýterlik tekserý, kóliktiń qozǵaltqysh bóligin jóndeý syndy qyzmet túrlerin bir sátte usyna bastapty. Búginde jumysy jandanyp, aýdan ortalyǵyndaǵy birshama turǵyndardyń kólikterin jóndep berip, alǵys arqalap júr.

– Búgingi zamannyń talaby – kásip ashyp, jumyssyzdarǵa jumys taýyp berý. Bul oraıda, men de óz kúshimmen kásip ashqan edim. Biraq suranys artqannan keıin keńeıtý múmkin bolmady. Osy turǵyda memlekettik baǵdarlamalardyń sharapatyn sezinip, «Eńbek» memlekettik baǵdarlamasy arqyly nesıe aldym. Munyń tıimdiligi – 6 paıyzben 5 jylǵa deıin beredi. Ári qarjy qolyma tıgennen keıin 6 aılyq kanıkýl berdi. Iаǵnı, tirshiligim alǵa basqansha bankke eshqandaı qarjy quımadym. Jarty jyldan keıin ǵana keste boıynsha aı saıynǵy aqshamdy sala bastadym. Qazir jumysym alǵa basyp keledi. Qosymsha dánekerleý sehynyń irgetasyn quıyp, qabyrǵasyn qalap qoıdym. Aldaǵy ýaqytta ol da iske qosylmaq. Búginde tehnıkalyq jóndeý ortalyǵynda 12 adam turaqty jumys istep júr, – deıdi M.Nysanbekov.