Shyndyqtyń shyraqshysy bolǵan Bóltirik sheshen kesenesi

Jambyl oblysynda Elbasy bastamasymen qolǵa alynǵan «Qazaqstannyń kıeli jerleriniń geografııasy» jobasynyń óńirlik balamasy urpaqty óńirdiń tereń tarıhymen tanystyryp, ólkedegi ár zamanǵa jatatyn eskertkishter jaıynda málimetter usynady. Al ol eskertkishiniń keıbiri tarıhı tulǵalalar arnalyp qoıylǵan. Ǵasyrlardan ǵasyrlarǵa jetken bul kóne jádigerler sol dáýirdegi qazaq mádenıetinen, kúndelikti turmys-tirshiliginen syr shertedi. Sondaı eskertkishterdiń biri Talas aýdanyndaǵy Seıilbek aýyly mańyndaǵy Bóltirik sheshen memorıaly, dep jazady Qamshy.kz aqparat agenttigi. 

Bóltirik Álmenuly XVIII–XIX ǵasyrlarda ǵumyr keshken tarıhı tulǵa. Qazirgi Jambyl oblysynyń Shý aýdanyna qarasty Shoqpar aýyly mańynda dúnıe esigin ashqan. Ańyz-áńgimelerde sózge sheshen, tapqyr, oı-júırik Bóltirikke bul qasıetti naǵashysy Qarmende bıden sińgeni aıtylady. Aýyl-aımaqty, rý, bolysty bylaı qoıǵanda Bóltirik aty elaralyq máselelerdi qantógissiz sheshý qabiletimen shyqqan. Tipti qazaqtyń sońy hany sanalatyn Kenesary han bastaǵan ult – azattyq qozǵalystarǵa qatysqan. Sheshenniń óz zamanynda ataqty Balpyq bı, andas Qutym bı, myrza Jınaq bı, sary úısin Sary bı, botpaı Sypataı bı, Baıserke bı, alban Malaı bı, Noǵaıbaı bı, tobyqty Qunanbaı myrza jáne Suranshy batyr, Sypataı batyr, Tezek tóre sııaqty ıgi jaqsylarmen birge el basqarý isine belsene atsalysqan. Onyń elaralyq daýdy qara qyldy qaqa jarǵandaı ádil sheshýi Bóltirik sheshenniń esimin qyrǵyz, ózbek elderi arasynda tanymal etti. Keıinnen Bóltirik sheshenniń naqyl sózderin Ahmet Baıtursynov, Máshhúr Júsip Kópeev, Sáken Seıfýllın, Zeınolla Qabdolov syndy tarıhıshy, aǵartýshy ǵalymdarynyń eńbekterine keńinen zerttelgen. Halyq aqyny Kenen Ázirbaevtyń «Ańyzdar syry» atty dastany bar.

Kózi tirisinde ádildigimen, týralyǵymen tanylǵan Bóltirik sheshenniń denesi qazirgi Talas aýdany Seıilbek aýylynda jatyr. Munda qaziraq mármár taqtalarmen qaptalǵan kesene ornatylǵan. Eki jyl buryn «Qazaqstannyń kıeli jerleriniń geografııasy» jobasy aıasynda paıda bolǵan óńirlik jobasyna engizilgen nysan aımaqqa joly túsken qonaqtar men jergilikti turǵyndardyń jıi at basyn buratyn oryn sanalady.