"Pedagog mártebesi". 350 myńǵa jýyq muǵalimniń qosymsha aqysy eki ese artady

27 tamyz kúni ótken Úkimettiń kezekti otyrysynda QR Bilim jáne ǵylym mınıstri Ashat Aımaǵambetov "Pedagog mártebesi týraly" zań jobasynyń jaı-japsaryn tanystyrdy, dep habarlaıdy Qamshy.kz aqparat agenttigi Qazaqparatqa silteme jasap.

Mınıstrdiń atap ótýinshe, zań jobalaryn daıyndaý barysynda pedagogıkalyq qyzmetti retteýdiń halyqaralyq tájirıbesi eskerildi. Atap aıtqanda birqatar shet eldiń zańdary, IýNESKO-nyń muǵalimderdiń jaǵdaıy týraly usynystary qarastyryldy.

"Pedagog mártebesi týraly" zań jobasy  19-baptan turady. Al qosymsha zań jobasy 192-bapty qamtıdy. Jalpy zań jobasy aýqymdy 5 baǵyttan turady. Atap aıtqanda, materıaldyq jáne materıaldyq emes yntalandyrý, áleýmettik kepildikter, ustazdardyń quqyqtaryn keńeıtý, muǵalimderdiń júktemesin azaıtý. Materıaldyq emes yntalandyrýǵa keler bolsaq, olar muǵalimderdiń júktemesin tómendetý, ar-namysy men qadir-qasıetin qorǵaý kepildigi, muǵalimderdiń balalaryna balabaqshaǵa birinshi kezekte oryn berý, Qazaqstannyń eńbek sińirgen ustazy memlekettik nagradasyne berý, taǵy basqa da materıaldyq emes yntalandyrýlar qarastyrylǵan. Negizgi materıaldyq yntalandyrýǵa keler bolsaq, onyń ishinde  synyp jetekshiligi men dápterlerdi teksergeni úshin aqyny eki ese ósirý jáne pedagogterge pedagogıkalyq sheberligi úshin qosymsha aqy tóleý qarastyrylǵan. Sonymen qatar zań jobasynda barlyq pedagogter úshin demalys ýaqytyn 56 kúnge deıin ulǵaıtý qarastyryldy. Magıstr dárejesi úshin jáne tálimger bolǵany úshin qosymsha aqy tóleý jáne taǵy da basqa sharalar qarastyrylyp otyr. Eń bastysy Memleket basshysynyń tapsyrmasyna sáıkes, 4 jyldyń ishinde jalaqyny 2 ese ósirý boıynsha másele qarastyryldy", – dedi ol. 

Mınıstrdiń aıtýynsha, joǵaryda atalǵan birqatar normalardy iske asyrý aıasynda qosymsha zań jobasy ázirlendi. Atalǵan zań jobasymen úsh kodekske, 15 zańǵa tolyqtyrýlar men ózgertýler engiziledi.

"Atalǵan zań normalary muǵalimderge kelesideı múmkindik  beretin bolady: synyp jetekshiligi úshin 173 myń muǵalimniń, al dápterlerdi teksergeni úshin 165 myń muǵalimniń qosymsha aqysy eki esege kóbeıedi. 212 myńnan astam qyzmetkerdiń biliktilik sanaty úshin aılyq jalaqydan 30-dan 50 paıyzǵa deıingi mólsherde qosymsha aqy alýyna múmkindik beriledi. 7 myń qyzmetkerdiń magıstr dárejesi úshin 10 AEK  mólsherinde qosymsha aqy alýyna múmkindik jasalady. 18 myń qyzmetkerdiń tálimgerligi úshin 1 bazalyq laýazymdyq mólsherinde qosymsha aqy alýyna múmkindik beriledi dep kútilýde. Jáne de 100 myńnan astam pedagogter qosymsha 14 kún jazǵy demalys alyp, endi 56  kún demalatyn bolady", – dedi Ashat Aımaǵambetov.

Endi muǵalimderdi ózine tán emes qyzmetke tartatyndar zańdyq túrde jazalanatyny aıtyldy.

"Pedagogtyń júktemesin  qysqartý boıynsha jeke normalar kózdelgen. Bul oraıda, muǵalimniń kásibı fraksııasyna kirmeıtin mindetterdi júkteýge, shamadan tys esep berýge, negizsiz tekserýler júrgizýge  tyıym salynatyn bolady. Quqyq buzýshylyq sýbektisine baılanysty muǵalimderdi ózine tán emes fýnksııalarǵa jáne artyq esep berýge tartqany úshin 20-dan 120 AEK-ke deıin aıyppul zań jobasynda qarastyrylǵan", – dedi mınıstr.