Jambyldyqtar oblystyń 80 jyldyq mereıtoıyna daıyndalyp jatyr

Jyr alybynyń esimimen atalatyn Jambyl oblysynyń turǵyndary óńirdiń 80 jyldyq mereıtoıyn atap ótýge qyzý daıyndyq júrgizýde. Bul maqsatta aımaqta mádenı-kópshilik is-sharalar kóptep ótkizilip, birqatar nysandar paıdalanýǵa berilmek dep jazady Qamshy.kz aqparat agenttigi. 

Mereıtoı aıasynda Áýlıeatada óńirdiń tarıhy men mádenıeti, tabıǵaty, birtýar perzentteri men aqyn-jyrshy, batyrlarynyń esimderin urpaq jadynda jańǵyrtý maqsatynda «Taraz muralary» serııasymen kóptomdyqtar shyǵarý josparlanǵan. Búgingi kúni kitapty shyǵarý 2 baǵytta iske asyrylyp, tarıhı-tanymdylyq ǵylymı-zertteý baǵyty boıynsha 15 tom, shyǵarmashylyq baǵyty boıynsha 35 tomdyq materıaldar jınaqtaldy.

Sondaı-aq, oblystan shyqqan óner juldyzdarynyń konserti, «О́rkenıetter toǵysyndaǵy Taraz» atty halyqaralyq ǵylymı-praktıkalyq konferensııa ótkizý josparlanyp otyr. Budan bólek kóptegen is-sharalar bar. Daıyndyq qyzý júrgizilýde.

Budan bólek, 80 jyldyq qarsańynda birqatar mádenı-áleýmettik nysandardyń qurylysy aıaqtalyp, paıdalanýǵa berilmekshi. Atap aıtqanda, mereıtoı qarsańynda «Shahrıstan» kesheninde oblystyq tarıhı-ólketaný mýzeıi, kórme pavılony, amfıteatr, qolóner sheberleriniń galereıasy, «Rýhanııat» ortalyǵynyń jańa ǵımaraty, kórkemdik-beıneleý óneri galereıasynyń ashylýy josparlanýda.

Al, burynǵy Jambyl Jabaevtyń eskertkishi ornalasqan jerde «Saǵat» stelasy boı kótermek. Qazirgi ýaqytta atalǵan aýmaqtaǵy qurylys jumystary qazir qarqyn alǵan. Stelanyń bıiktigi 40 metrge jetedi. Onyń ár qabyrǵasyna bıiktigi 4 metr bolatyn 4 saǵat ornatylady. Demek, bul nysan qalanyń kez kelgen buryshynan kózge túsedi. Al steladaǵy qońyraý 1 saǵat saıyn belgi berip turady. Syrtqy árleý jumystary tolyǵymen shyǵystyq naqyshta júrgiziledi. Sondyqtan munda «Samarqan kirpishi» syndy erekshe qurylys materıaldary paıdalanylmaq.

Jalpy, atalǵan nysan Taraz qalasyndaǵy eń kórikti oryndardyń birine aınalatynyn aıtady. Ony da joǵaryda ataǵanymyzdaı oblystyń 80 jyldyq mereıtoıy qarsańynda paıdalanýǵa berý josparlanyp otyr.

Esterińizge sala keteıik, 1939 jyly qazanda Qazaq KSR-i Úkimetiniń sheshimimen Áýlıeata oblysynyń ataýy Jambyl oblysy bolyp aýystyryldy. Bul Jambyl oblysynyń qurylǵan kúni sanalady.