Tarazdyń tarıhı kelbeti qalyptasyp keledi

Taraz qalasy – 2 myń jyldan astam tarıhy bar elimizdegi óń kóne shahar. Osyny eskere otyryp, Jambyl oblysynyń ákimi Asqar Myrzahmetov qalanyń sáýlettik stıline tarıhı elementterdi engizip, onyń ótkeni men búginin salalastyrýdy basty maqsat etip qoıǵan bolatyn. Atalǵan tapsyrmaǵa oraı oblys ortalyǵyndaǵy barlyq qurylys nysandarynda kóne qalanyń kelbetin qalyptastyrý boıynsha jumystar júrýde dep jazady Qamshy.kz aqparat agenttigi. 

Bul iste kóne qala ornynda qurylysy júrip jatqan «Shahrıstan» tarıhı kesheni orasan zor úles qospaqshy. Atap aıtqanda, atalmysh keshende ólketaný murajaıynyń, «Retro-festıval» amfıteatrynyń, kórme pavılonynyń, kórkem sýret galereıasynyń, qol-óner sheberhanalar ortalyǵynyń, «Rýhanııat» ortalyǵynyń qurylystary júrgizilýde. Bul nysandardyń barlyǵy shyǵystyq stılde salynýda.

Osy aýmaqta jolaýshylardy tasymaldaıtyn 26 baǵyttaǵy qoǵamdyq kólikterdiń ótetinin eskere otyryp, atalǵan «Arbat» aımaǵyn aınalyp ótý úshin Baızaq batyr kóshesin Tóle bı dańǵylynan Tashkent kóshesine deıin keńeıtý, Ǵ. Baıtasov kóshesin Tóle bı dańǵylynan Kósheneı kóshesine deıin ortasha jóndeý jumystary men Kósheneı kóshesinen Aqqozıev kóshesine shyǵatyn joldyń qurylysy josparlanýda.

Sonymen qatar, Tóle bı dańǵylynyń boıymen Sypataı batyr kóshesinen bastap «Qarahan» kesenesine deıin skver, jaıaý júrginshiler aımaǵy men alleıasy salynady. «Taraz-Arena» sport kesheniniń mańyndaǵy «Dańqty sportshylar» alleıasy boı kóterse, «Mamyr» saıabaǵyn abattandyrylyp, «Kóne Taraz» kesheniniń mańynda bıiktigi 40 metrden turatyn «Saǵat» stellasy ornatylady.

Al, jańa 15-shi móltek aýdanynda 40 gektar quraıtyn mádenı-ákimshilik ortalyǵyn abattandyrý men Oqýshylar saraıy, jeńil atletıka maneji jáne gımnastıkalyq sport kesheniniń qurylystary bıýdjet esebinen, al Neke qııý saraıy men Saltanat saraıynyń qurylystary jeke ınvestorlar esebinen bastalýy josparlanýda.

Osy rette, retsiz saýda oryndaryn joıý boıynsha da jumystar júrýde. Bul maqsatta «Kóshe saýdasy – 100 oryn» jobasy iske asyrylýda. Qazirgi kezde bir tıpti dúńgirshekterdiń eskızi bekitilip, «Taraz» áleýmettik kásipkerlik korporasııasy arqyly 70 jer telimderi jeke kásipkerlerge jalǵa berilip, taǵy 20 telimniń qujattary rásimdelýde. Olar da joǵaryda atalǵan sáýlet stılinen ajyramaıdy.