Shymkent ákimi qaladaǵy qurylys nysandarynyń jumysyn synǵa aldy

Shymkent ákimi Erlan Aıtahanov qaladaǵy iri qurylys nysandardy aralap, jumystardyń baıaý júrip jatqanyn aıtty dep habarlaıdy Qamshy.kz aqparat agenttigi Shymkent qalasy ákiminiń baspasóz qyzmetine silteme jasap. 

Qala basshysy qurylysqa jaýapty mamandardyń jumysty uıymdastyra almaıtynyn synǵa alyp, eń aldymen sapaǵa mán berýdi tapsyrdy. Sonymen qatar, qurylys qarqynyn arttyryp, merdigerlerdiń jumysyn erekshe baqylaýǵa alý kerektigin de qadap aıtty.

E.Aıtahanov eń aldymen halyqaralyq áýejaıdyń jańa termınalynyń qurylys jumystarymen tanysty. Saǵatyna 400 adam qabyldaı alatyn termınal iske qosylǵan kezde, jolaýshylar aǵyny 10 esege deıin ulǵaıady dep josparlanýda.

Sonymen qatar, Erlan Qýanyshuly Qyzyljar shaǵynaýdanyndaǵy A-2 avtojolynyń jáne A-2 Badam kópiri men D.Qonaev dańǵyly qurylystarynyń jumysyn kórdi. Munan keıin ákimge «Qoshqar ata» ózeni jaǵalaýyn abattandyrý, eski qalashyqtaǵy «Sıtadel» jobasy men Shymkent-City turǵyn alabyndaǵy «Kongress-Sentr» jobasy tanystyryldy. 

Qala ákimi Shymkenttiń zamanaýı jańa kelbetin qalyptastyrý úshin qolda bar kúshtiń bárin biriktirip, tıimdi jumsaý kerektigin aıtty.

«QR Tuńǵysh Prezıdenti Nursultan Nazarbaevtyń megapolısti damytý boıynsha qoıǵan startegııalyq mindetterin tıisti deıgeıde oryndaýymyz qajet. Osy baǵyttaǵy júrgizilip jatqan jumys josparyn tıimdi oryndaýdy qamtamasyz etý boıynsha barlyq qajetti sharalardy qabyldaýdy tapsyramyn. О́zderińizge málim, 2020 jyly Shymkentte TMD elderiniń mádenı astanasy jylyn ótkizemiz. Sondyqtan, qazir árbir salanyń basshylary jumysyn shıratýy kerek», - dedi E.Aıtahanov.

Budan bólek E.Aıtahanov qurylysy júrip jatqan «Bozaryq 220/110/10 kV» qosalqy stansııasyna bardy. Atalǵan nysan qala shetindegi shaǵynaýdandardy elektr jaryǵymen qamtamasyz etedi. Qala ákimi jobany ýaqtyly aıaqtaýdy tapsyrdy.

«Bozaryq 220/110/10 kV» stansııasy bıyl qarasha aıynda paıdalanýǵa beriledi. Nátıjesinde, 250 myń adam turatyn 10 jańa turǵyn úı alaby úzdiksiz elektr qýatymen jabdyqtalady.

Aralaý qorytyndysy boıynsha qala basshysy tıisti salalyq jetekshilerge júrgizilip jatqan qurylys nysandarynyń sapasy men ýaqtyly aıaqtalýyna basa nazar aýdaryp, baqylaýdy kúsheıtýdi júktedi.