Qazaqstan halqy qashan 20 mıllıonnan asady?

Nur-sultan qalasynyń halqy aldaǵy onjyldyqtarda 3 mılıonnan asady.

Týý jáne ólim-jitim kórsetkishteri ótken jyldyń deńgeıinde saqtalsa 30 jyldan keıin Qazaqstan halqy 24 mıllıon adamnan asady. Olardyń 9 mıllıony elimizdiń eń iri úsh qalasynda turatyn bolady. Mundaı tujyrymdarǵa Eńbek resýrstaryn damytý ortalyǵynyń sarapshylary QR Ulttyq ekonomıka mınıstrligi statıstıka komıtetiniń aqparatyn taldaý nátıjesinde qol jetkizdi.

Resmı málimetterge sáıkes, Qazaqstan halqy bıyl 1 shildedegi jaǵdaı boıynsha jyl basynan beri 112 myń adamǵa kóbeıip, 18,5 mıllıonnan asqan. Sonymen birge, qalalaný (ýrbanızasııa) prosesi belsendi túrde jalǵasýda. Birinshi jartyjyldyqta 112 myń turǵynnyń ishinde qalalardyń úlesi 74,3% qurady (2019 jyldyń basynda 58,2% bolǵan). Aýyldyq jerlerdegi halyqtyń sany bar-joǵy 29 myń adamǵa ósti, bul tómen kórsetkish turǵyndardyń aýyldardan ketýimen baılanysty. Jyl basynan beri aýyldyq aýmaqtardan kóshi-qonnyń teris saldosy 23 myń, al tabıǵı ósim 52 myń adamdy qurady. Almaty, Nur-sultan jáne Shymkent qalalarynda qazirgi ýaqytta halyqtyń 22% turady. Eger olarǵa irgeles jatqan oblystardy (Almaty, Aqmola jáne Túrkistan) qossaq, onda bul kórsetkish 47,5% deıin artady.

Sarapshylarynyń málimeti boıynsha, týý jáne ólim-jitim kórsetkishteri ótken jyldyń deńgeıinde, al kóshi-qon aǵyndary sońǵy bes jyldyń ortasha máninde saqtalsa, Qazaqstan halqynyń ortasha jyldyq sany 2027 jylǵa qaraı 20 mıllıon adamnan asady, al 2050 jylǵa qaraı ol 24,5 mıllıon adamǵa jetedi.

«Osy jaǵdaılarda 2050 jylǵa qaraı Nur-sultan qalasy turǵyndarynyń sany 3,1 mılıonnan asady, bul 2018 jylmen salystyrǵanda 194% ósimge sáıkes keledi jáne eń iri megapolıs – Almatyǵa jaqyndaı túsedi. Otyz jyldan soń osy shahar turǵyndarynyń sany 3,3 mıllıonǵa jetip, ósim 82% quraıdy. Úshkinshi megapolıs – Shymkenttegi halyq sany 2050 jylǵa taman 2,6 mln adamǵa nemese 167% deıin ósedi», – dedi ERDO eńbek resýrstaryn boljaý departamentiniń dırektory Dmıtrıı Shýmekov.

Ol sonymen qatar, respýblıkanyń óńirleri arasynda munaı óndiretin aımaqtarda halyqtyń qarqyndy ósýi kútiletinin atap ótti. Sarapshylardyń boljaýynsha 2050 jylǵa qaraı Mańǵystaý oblysynda shamamen 1 mıllıon 360 myń adam (2018 jyly – 669,3 myń adam), Atyraýda – 1,1 mıllıon adam (2018 jyly – 627,2 myń adam) turatyn bolady.

«Alaıda halyqtyń ósýi birkelki emes. 2050 jylǵa qaraı bes oblystyń (Aqmola, Qaraǵandy, Pavlodar, Soltústik jáne Shyǵys Qazaqstan oblystary) halqy bútindeı eseptegende 1,3 mıllıon adamǵa nemese 2018 jylmen salystyrǵanda 24% qysqarýy múmkin. Tek birinshi jartyjyldyqta atalǵan óńirlerdiń halqy 8,3 myń adamǵa azaıǵan, al ketken adamdardyń sany kelgenderden 21,4 myńǵa artyq. Eger kóshi-qon qurylymynda 20-30 jas aralyǵyndaǵy adamdar basym bolatyndyǵyn eskersek, tabıǵı ósý deńgeıiniń tómendeýine baılanysty adam sanynyń azaıýy budan da jyldamdaı túsýi yqtımal», – dep tolyqtyrdy Dmıtrıı Shýmekov.

QazAqparat