Nápaqy tabýǵa kelip, dymsyz qaldy

Atyraýǵa jumys jasaýǵa kelgen Qyzylorda oblysynyń turǵyny ózinde bar zattaryn túgelimen joǵaltyp aldy. Qujattar men aqshasy salynǵan sómkesin taksıde umytyp ketken.

"Telefonym qaltamda qaldy. Jumysty ýaıymdaımyn dep taksıden túserde janymda turǵan sómkemdi alýǵa da umytyp ketken bolýym kerek. Jumysqa kelerde týystarymnan qaryzǵa 50 myń teńge alǵan bolatynmyn, ózimde 20 myń
teńge aqsham boldy. Qas qaǵym sátte qujatsyz, aqshasyz qalyp qoıdym. Al, ózi tańǵy 4-te Teńiz vahtalyq qalashyǵyna ketýim qajet, ótkizý qujattaryn rásimdetip qoıǵanmyn. Qatty qobaljydym, taksıge jolaı mingender zattarymdy alyp qoısa, keri qaıtarmaıtyn edi",- dep jaǵdaıyn baıandady Kúláısha Asqarova.

"Men toqtaǵan páterdiń ıesi polısııa kómektesedi dep 102-ge qońyraý shaldy. 20 mınýt ótkennen keıin "Jedel basqarý ortalyǵyna kelińiz. Siz kórsetken mekenjaı boıynsha avtokóliktiń memlekettik belgisin anyqtadyq. Qazir júrgizýshini shaqyrtyp jatyrmyz" dep polısııadan habarlasqanda óz-ózime senbedim",- dep qýanyshyn jasyra almaǵan Qyzylorda oblysynyń turǵyny polıseılerge alǵysyn qalalyq polısııa basqarmasy ǵımaratynyń aldynda beınejazbamen joldady.

Qujattary men sómkesi esh shashaý shyqpastan Kúláıshaǵa qaıtaryldy. Eske sala ketsek, qazir Atyraý qalasynda jedel basqarý ortalyǵyna qosylǵan 759 beınebaqylaý kamerasy jumys jasap tur.