Shyǵystyń kıeli jerlerine týrısterdi tartýǵa kúsh salynady

Shyǵys Qazaqstanda kıeli jerlerge týrısterdi tartý boıynsha aýqymdy jumystar qolǵa alynyp jatyr. Bul ishki týrızmniń damýyna tyń serpin bermek dep habarlaıdy Qamshy.kz aqparat agenttigi.  

Oblystyń týrızm basqarmasynyń basshysy Marat Qabaqovtyń aıtýynsha, Abaı aýdanyndaǵy Qońyr áýlıe úńgiriniń ishin jóndeýge 25 mln. teńge qarajat bólinip, tolyq ıgerilgen. Qazirgi kúni qazaqstandyq ınvestor úńgirdiń qasynan 25 orynǵa shaqtalǵan qonaqúı qurylysyn bastaǵan.     

Dál osyndaı jumystar Tarbaǵataı aýdanyndaǵy Yrǵyzbaı ata kesenesinde de júrgizilgen. Máselen, keseneniń aýmaǵyn abattandyrýǵa 50 mln. teńge bólinip, ornymen jumsalǵan.  

– Keıingi jyldary óńirdiń týrızm salasyna sheteldik ınvestorlardyń kelýi qarqyn ala bastady. Naqty derekterge súıensek, aldyńǵy jyldarmen salystyrǵanda byltyr bul kórsetkish 25 paıyzǵa ósti. Alaıda biz qazir ishki týrızmge kóńil bólip otyrmyz. Ásirese, elimizdiń kıeli jerleriniń tizimine engen qasıetti oryndarǵa basymdyq berilýde, – dep atap ótti basqarma basshysy. 

Osy oraıda basqarma basshysy ishki týrızmdi ilgeri bastyrýda «Rýhanı jańǵyrý» baǵdarlamasy aıasynda júzege asyrylyp kele jatqan «Ádebı Shyǵys» jobasynyń bereri mol ekenin aıtty.  

Esterińizge sala keteıik, «Ádebı Shyǵys» jobasynyń maqsaty mektep oqýshylaryna óńirdiń kıeli jerlerin, mádenı, tarıhı oryndaryn aralatyp, Abaı, Shákárim, Muhtar sııaqty alyptardyń týǵan mekenine saıahat uıymdastyrý.