Arystanbek Muhamedıuly erekshe aspapta oınap, kópshilikti tań qaldyrdy (vıdeo)

Nur-Sultanda Joǵary Evrazııa ekonomıkalyq keńesiniń mereıtoılyq májilisiniń qadirmendi qonaqtaryna arnalǵan konsert ótken bolatyn dep habarlaıdy Qamshy.kz aqparat agenttigi. 

Bul týraly Mádenıet jáne sport mınıstri Arystanbek Muhamedıuly óziniń feısbýk paraqshasynda jazdy. Mınıstr konsertte ózi de óner kórsetip, kópshilikti jańa bir qyrymen tań qaldyrdy. 

"Dostarym, keshe Nur-Sultanda ótken Joǵary Evrazııa ekonomıkalyq keńesiniń mereıtoılyq májilisiniń qadirmendi qonaqtaryna arnalǵan konsertimiz tabysty ótti. Bul is-shara Nursultan Nazarbaevtyń Evrazııalyq ıntegrasııa týraly ıdeıasynyń 25 jyldyǵyna jáne Evrazııa ekonomıkalyq keńesi týraly kelisimge qol qoıylýynyń 5 jyldyǵyna arnalǵany belgili.

Tuńǵysh Prezıdent Nursultan Nazarbaev, Memleket basshysy Qasym-Jomart Toqaev, Reseı Prezıdenti Vladımır Pýtın, Belarýs Prezıdenti Aleksandr Lýkashenko, Qyrǵyzstan Prezıdenti Sooronbaı Jeenbekov, Armenııa premer-mınıstri Nıkol Pashınıan, EAEK janyndaǵy baqylaýshy memleket basshysy retinde Moldova Prezıdenti Igor Dodon, Tájikstan Prezıdenti Emomalı Rahmon jáne TMD Atqarýshy komıteti tóraǵasy Sergeı Lebedev. Mundaı qurmetti qonaqtardyń aldynda óner kórsetý - óte jaýapty is, dostarym!

Súıikti aspabym - vıoloncheldi qolyma alyp, RF Halyq ártisi Sergeı Roldýgın basqarǵan vıolonchelshiler ansamblimen óner kórsetip, fransýz kompozıtory Sharl-Kamıl Sen-Sanstyń ataqty «Aqqý» horeografııalyq mınıatıýrasyn oryndadyq. Bizdi eki arfashy qyz súıemeldep, Aqqý rolin «Astana Opera» MOBT jetekshi solısi, QR Eńbek sińirgen qaıratkeri Áıgerim Beketaeva oryndady. Jurt aldynda oınamaǵaly biraz bolyp edi, meni bılegen qýanysh sezimin sózben jetkizý qıyn.

Qurmetti qonaqtar aldynda SSRO Halyq ártisi, QR Memlekettik syılyǵynyń laýreaty Álibek Dinishev, Qazaqstannyń Eńbek sińirgen ártisi, QR memlekettik syılyǵynyń laýreaty Maıra Muhamedqyzy, Qazaqstannyń Eńbek sińirgen ártisteri Meıir Baınesh, Medet Shotabaev, «Plasıdo Domıngo Operalııasy» halyqaralyq ánshiler konkýrsynyń laýreaty, «Astana Opera» MOBT solısi Marııa Mýdrıak, QR Eńbek sińirgen qaıratkeri Arman Júdebaev (Qazaqstan Respýblıkasy), «Sazgen sazy» folklorlyq-etnografııalyq ansambli jáne dombyrashylar ansambli, halyqaralyq konkýrstar laýreaty Taıyr Tájiǵulov, halyqaralyq konkýrstar laýreaty Alfııa Abdýlmanova j.b. óner kórsetti.

Keremet óneri úshin barlyq ártisterge shyn júrekten alǵys aıtamyn! Qadirmendi qonaqtarymyz osy konsertten erekshe áser alyp, esterinde qalady degen senimdemin!" dep jazdy mınıstr. 

Usynǵan: Maqpal Sembaı