Eleýsinov jetinshi ret jeńiske jetti. Biraq áli júzdiktiń syrtynda júr (vıdeo)

Qazaqstandyq kásipqoı boksshy Danııar Eleýsinov (7-0, 3 KO) chılılik boksshy Lýıs Norambýenany (3-2-1, 0 KO) jeńdi dep habarlaıdy Qamshy.kz aqparat agenttigi. 

Jartylaı orta salmaqta (66,678 kg) judyryqtasatyn qos boksshynyń arasyndaǵy jekpe-jek AQSh-tyń Okson-Hılle (Merılend shtaty) eldimekeninde 26 mamyrda ótti. 6 raýndqa josparlanǵan jekpe-jekte Danııar Eleýsinov tóreshilerdiń sheshimimen jeńdi.

Bul – Eleýsinovtyń kásiqoı bokstaǵy jetinshi jeńisi. Ol buǵan deıin ótkizgen 6 jekpe-jeginde de qarsylastarynan basym bolǵan. 

Aıta keteık, chılılik boksshy Danııar Eleýsinovke jekpe-jekke bir kún qalǵanda ǵana qarsylas atandy. Oǵan deıin Eleýsinovtyń promoýterleri Danııar kásipqoı karerasyndaǵy jetinshi jekpe-jeginde meksıkalyq boksshy Mıgel Zamýdıoǵa (43-12-1, 27 KO) qarsy judyryqtasady degen aqparat bergen. Alaıda Merılenda shtatynyń atletıkalyq komıssııasy meksıkalyq boksshyǵa jekpe-jekke shyǵýǵa ruqsat etpedi. Sonymen qatar buǵan deıin Danııar Eleýsinovtyń 8 maýsymda óziniń otandasy Genadıı Golovkın men kanadalyq boksshy Stıv Rolls arasynda ótetin boks keshinde meksıkalyq boksshy Fernando Karkamoǵa (23-9, 18 KO) qarsy judyryqtasatyny da aıtylǵan. Biraq Qazaqstan namysyn qorǵap júrgen qos boksshy  bir boks keshinde judyryqtasa almaıtyn boldy. Sebep - Golovkın men Eleýsinovtyń promoýteriniń kelise almaýy. 

Esterińizge sala keteıik, bul jekpe-jek 28 jastaǵy Eleýsinovtyń AQSh-taǵy tórtinshi kezdesýi. Sonymen qatar ol Ulybrıtanııada eki ret rıngke shyqsa, bir ret Monakoda jekpe-jek ótkizgen. 2016 jyly Rıoda ótken Olımpıada oıyndarynda altyn medal alǵan Eleýsinov 2018 jyldyń  sáýirinen bastap kásipqoı boksta judyryqtasyp júr.  

Qazir Danııar Eleýsinov kásipqoı boksshylardyń reıtıngin jarııalap otyratyn Boxrec.com saıtynyń tiziminde jartylaı orta salmaqtaǵy 1769 boksshynyń arasynda 169 orynda kele jatyr. Eleýsinovten bólek, dál osy salmaqta qazaqstandyq boksshylar Nursultan Jańabaev (81 oryn), Bobyrjan Momynov (118 oryn), Bahtııar Eıýbov (164 oryn) bar. Bul salmaqtyń kóshin amerıkalyq boksshy Terens Kroýford bastap tur. Sondaı-aq, úzdik ondyqtyń ishinde Mennı Pakıao (Fılıpın), Dennı Garsııa (AQSh), Kıt Týrman (AQSh), Amır Han (Ulybrıtanııa) syndy ataqty boksshylar da bar.

Daıyndaǵan: Mııat Káshibaı