Nur-Sultanda taǵy da mıtıng, taǵy da analar... (vıdeo)

Qazaqstan astanasy Nur-Sultan qalasyndaǵy «Hilton» qonaqúıiniń janynda kóp balaly analardyń narazylyq aksııasyny ótýde, dep jazady Qamshy.kz aqparat agenttigi. 

Halyqaralyq ekonomıkalyq forým ótip jatqan atalmysh ǵımarattyń aldyna 30-ǵa jýyq analar (kóp balaly, jalǵyzbasty) jınalyp, Qazaqstannyń burynǵy prezıdenti N.Nazarbaevtyń bılikke  kelip, ózi ýáde etken ataýly áleýmettik kómekti berýin talap etti.

"Elbasy bılikke qaıta kelsin. Bizge ózi aıtqan ataýly áleýmettik kómegin bersin. Biz Elbasyn kórgimiz keledi. Elbasymen kezdeskimiz keledi" dep urandaǵan analardy Astana qalalyq polsııa departamentiniń ókilderi forým ótip jatqan ǵımaratqa jibermeı qoıdy.

Narazylyq bildirgen analar Qazaqstan halqynyń, onyń ishinde kóp balaly analardyń jaǵdaıy nashar ekenin aıtyp, bul máseleniń ońdy sheshilýin talap etti. 

"Balalarǵa úı berilsin!", "Baspana" dep aıqaılaǵan analarmen sóılesýge forým ótip jatqan ǵımarattyń ishinen Nur-Sultan qalasynyń ákimi Baqyt Sultanov pen Eńbek jáne halyqty áleýmettik qorǵaý mınıstri Berdibek Saparbaev kelip, olardy avtobýspen qala ákimdiginiń ǵımaratyna alyp ketti.

Narazylyq bildirgen analar "avtobýsqa BAQ ókilderi minse ǵana, qala ákimdigine baramyz" dep talap qoıdy. Kóp balaly analardyń talabyn oryndaǵan qala ákimi men mınıstr jýrnalısterdi de avtobýsqa mingizip, qala ákimdigine qaraı jol tartty.

Qamshy.kz aqparat agenttigi aldaǵy ýaqytta oqyrmandarǵa Nur-Sultanda ótken analardyń narazylyǵy týraly tolyqtaı málimet beredi.

 ♦Oqı otyryńyz: https://www.qamshy.kz/article/maseleninh-sheshilwi-ushin-analar-mindetti-turde-mytyngke-shighwi-kerek-pe.html