Aýǵandardyń tutqynyna túsken sovet sarbazy: Reseıge eshqashan qaıtqym kelmeıdi (vıdeo)

Aýǵandardyń tutqynyna túsken sovet sarbazy ne sebepti óz eline qaıtqysy kelmeıtinin túsindirdi dep jazady Qamshy.kz aqparat agenttigi "Nastoıashee Vremıa" telearnasynyń  deregin negizge alyp. 

Ol aýǵan soǵysy kezinde tutqynǵa túsip qalǵan. О́lgisi kelmegen sovet sarbazy tutqyndalǵannan keıin ıslam dinin qabyldap, "Talıban" radıkaldy tobynyń qatarynda bolǵan. Tipti sovet áskerine qarsy soǵysypty. 

Gerat Hakımov aýǵan soǵysy kezinde tutqynǵa túsip, keıin umyt qalǵan jalǵyz sovet áskeriniń sarbazy emes. Soǵys kezinde Gerat Hakımov basynan aýyr jaraqat alǵan. Sol sebepti jyldar men oqıǵalardy jıi shatastyrady jáne orys tilin de umytyp qalǵan. Biraq ol áli kúnge deıin sovet bıligin keshire almaı keledi. Oǵan sovet bıliginiń sol jyldardaǵy 10 shaqty sarbazǵa satqyndyq jasap, tozaq ómirge tastap ketkeni sebep bolǵan. 

"Biz 21 sarbaz Geratta joǵalyp kettik. Men aýyr jaraqat alǵan edim. Keıin tutqynǵa tústim. Ol kezde bılikten kómek suraý úshin qazirgideı ınternet, telefon bolmady. Sol sebepti biz sol jerde qalyp qoıdyq. Keıin bılik bizdi umytyp ketti. Sovet úkimeti tipti qaıtys bolǵan sarbazdardy da izdestirmedi. "Men 5 jyl boıy sovet úkimeti bizdi izdep keledi" dep úmittendim. Alaıda 30 jyl ótkennen keıin de olar mundaı qadamǵa barmady. Otan úshin janymyzdy qurban etken bizdi umytty. Men sovet úkimetin eshqashan keshirmeımin. Qazir otbasym bar. Meniń Reseıge qaıtqym kelmedi. Aýǵandar óte qonaqjaı, jaqsy halyq. Olar aýyr jaraqattanǵan kezde maǵan kómek kórsetti", -deıdi Hakımov. Biraq ony qazir Aýǵanstanda Abdýlla Sheıh dep ataıdy. Eki ret úılengen. Birinshi áıeli bosaný kezinde qaıtys bolypty. Birinshi áıelinen bir qyzy bar. 

Sondaı-aq Iranǵa barǵan kezde reseılik azamattar ony elge qaıtarǵysy kelgen. 

"Tipti zorlyqpen meni Reseıge alyp ketpekshi boldy. Olar maǵan Iranda osyndaı dórekilik tanytsa, elge barǵanda ne isteıdi? Men Reseıge barsam, jazyqsyzdan jazyqsyz jazalaı ma dep qorqamyn. Al bul elde meniń eń jaqyn otbasym bar. Al Reseıge eshqashan barmaımyn, barǵym da kelmeıdi", deıdi Abdýlla Sheıh. 

Aýdarǵan: Ásel Bolatqyzy