Bekzattyń rólin somdaıtyn akter: Chempıonnyń qazasyn estip, 3 kún tamaq ishpeı qoıyppyn

Bıyl tanymal boksshy Bekzat Sattarhanov týraly serıal jaryqqa shyǵady. Rejısser Murat Bıdosov Bekzattyń róline jas akter, ánshi Samat Ázimqulovty laıyq kórgen. Samat bala kezinen bastap Bekzat Sattarhanovtyń jankúıeri. Qamshy.kz aqparat agenttiginiń tilshisi osyǵan oraı Samat Ázimqulovpen suhbattasty. 

— Siz "Bekzat" serıalynda basty rólge qalaı keldińiz? Kastıng arqyly ma, álde arnaıy usynys tústi me?

— Joq, eshqandaı kastıng bolǵan joq. Serıaldyń rejısseri Murat Bıdosov Astanada júrgen kezde habarlasyp, «bokstan habaryń bar ma?», dep surady. Habarym bar ekenin aıttym. Serıal týraly lám-mım demedi. Jaı ǵana «keshke kezdeseıik, aqyldasatyn sharýa bar», dep qysqa ǵana qaıyrdy. Kelisken jerge barǵanda maǵan bastan-aıaq bir qarap shyqty. Kózqarasy ózgeshe edi. Áńgime barysynda óziniń usynysyn jetkizdi Men de kishkentaı kezden Bekzat Sattarhanovtyń kýmıri ekenimdi aıttym. Bekzattyń rólin somdaý meniń kópten bergi armanym bolatyn. Shyny kerek bul armanymdy shyndyqqa aınaldyrý úshin talaı esikti qaǵyp, talaı tabaldyryqty tozdyrdym.  Murat Bıdosovpen  oıym bir jerden shyqty. Qatty qýandym. Keıin Bekzatpen birge jattyqqan dostary keldi. Olarmen de keńesip bir sheshim qabyldadyq. Bir aıdyń ishinde túsirilim toby jumysqa kiristi. 

— Serıalǵa túspes buryn úlken jaýapkershilikti sezinip, ishteı daıyndalǵan shyǵarsyz? Qıyn boldy ma?

— Men mektepten Bekzattyń jankúıeri boldym. Bekzat týraly jazylǵan gazet-jýrnaldy qıyp alyp, olımpıadaǵy oıyndaryn kassetaǵa basyp, barynsha zerttep júrdim. Nege ekenin bilmeımin, áıteýir bala kezden Bekzattyń ómiri qatty qyzyqtyrdy. Tipti 8-9 synypta oqyp júrgende Bekzat Sattarhanov týraly fılm shyqsa, onyń obrazyn men somdasam degen arman bolǵan. Negizi kóp adamdar meni Bekzat Sattarhanovqa uqsatady. «Syrtqy reńiń, bas formań da Bekzatqa keledi» deıtinder kóp. Sol sebepti bul rólge bala kezden ishteı daıyndaldym desem de bolady.

Qalaı Bekzat Sattarhanov olımpıada chempıony atandy, sol kezden bastap kýmırine aınaldym. Olıpıadany ákem ekeýmiz birge kórgenbiz. Chempıon bolǵany, medaldi moınyna taǵyp jatqany áli kúnge deıin esimde. Bekzat jańa jyldyń qarsańynda qaıtys boldy ǵoı. Ákemniń aıtýynsha,  Bekzattyń qazasyn estip men 3 kúndeı tamaq ishpeı qoıyppyn. Keıinnen onyń ómirin ózimshe zertteı bastadym. Chempıonnyń mektepte, ómirde, sportta qandaı adam bolǵany qatty qyzyqtyrdy.

— Bekzat Sattarhanovtyń rólin somdaý barysynda neni úırendińiz? Bekzat pen Samattyń boıynda qandaı uqsastyqtar men aıyrmashylyqtar bar?

— Bekzat aǵam da bala kezinde buzyqtaý bolypty. Sol jaǵynan uqsas shyǵarmyz. Túsirilim kezinde Bekzattyń dostary, synyptastary keldi. Olarmen jaqyn aralasyp, shańyraǵynda qonaqta boldym. Tipti «Bekzatty kórgendeı bolyp otyrmyn», dep kózderine jas alǵandar da kezdesti. Olar bizge kóp estelikter aıtty. Bekzat týraly estelikter kóp. Sondaı estelikterdiń birin Nurjan Tólendıev te aıtyp bergen. «1999 jyly Bekzat olımpıadaǵa joldama aldy. Ol kúnde júgiretin, sharshamaıtyn. Ústinen terdiń býy burqyrap turatyn», - deıdi Nurjan Tólendıev.

Bekzat ósken Túrkistandaǵy aýdan buzyqtardyń mekeni bolǵan. Aýdanda tóbeles sekildi, neshe túrli jaǵdaılar oryn alǵan. Men de kishkentaı kezimde týra sondaı boldym. Sol jaǵymyz uqsaıdy. Sondaı-aq Bekzat sekildi qazaqy tárbıemen, qarapaıymdylyqty boıǵa sińirip, kishkentaıymyzdan «úlkenniń aldyn kespe» degen sekildi tyıymdardy oryndap óstik.

Negizinde men sporttan alys adam emespin. 1999 – 2009 jyldar aralyǵynda kıkboksıngpen aınalystym. 2009 jyly Ýkraınadaǵy jarystardyń birinde kózimnen aýyr soqqy alyp, dárigerler sportty jalǵastyrýyma tyıym saldy. Sol kezde  «Sport sheberi» ataǵyn alǵanmyn. Sońǵy 9 jylda kásibı túrde sportpen aınalyspadym.  Degenmen, aptasyna 2-3 ret sportzalǵa baryp turamyn.

Bokstyń kıkbokstan  qıyn ekenin túsindim. Sharshaǵan kezde kıkboksta aıaqty qoldanýǵa bolady, al boksta tek judyryqtasýǵa ǵana ruqsat berilgen. Bekzattyń olımpıadadaǵy jekpe-jekterin túsirý kezinde men kásibı boksshylarmen judyryqtastym. Bul shyndyǵynda shynaıy boldy. Meniń murnym da qanady, kózim de kógerdi, qasym da jaryldy. Sol sátte men bokstyń qıyn sport túri ekenin,  buryn oılaǵandaı ońaı emes ekenin túsindim. Al úırengen dúnıelerim óte kóp boldy.

— Obrazdy somdaý barysynda qatty qınalǵan kezińiz boldy ma?

— Bekzattyń týǵan elindegi jekpe jekti túsirý barysynda sol jaq betimnen, bas jaǵymnan  aýyr soqqy aldym. Túsirilimdegi jigittiń qoly synyp ketti. Úshinshi túsirilimde osyndaı jaısyz oqıǵa boldy. Sol jaq betim qatty isip ketkendikten, 3-4 kúndik túsirilimde oń jaǵymmen serıalǵa túsip júrdim. Sońǵy túsirilimde ómirimdegi eń aýyr soqqy aldym. Keıin aǵalarymyz «Sen anaý-mynaý emes, Bekzattaı azamattyń rólin somdap jatsyń ǵoı. Shyda, bul ońaı emes», - dep qoldaý bildirdi.

Shyny kerek, serıaldy túsirý sál asyǵystaý boldy. Qarashanyń basynda kezdestik, «osy aıdyń sońynda túsirilim  bastalady» degende men tańǵaldym. Sebebi bir adamnyń ómirin túsirý ońaı sharýa emes qoı. Serıal aldynda  daıyndalyp, salmaq túsirip, formaǵa kelý kerek boldy. Bir apta sportzalda jattyqtym. Keıin rıngtegi aıqastardy túsire bastadyq. Men úshin Bekzattyń olımpıada kezindegi jekpe-jekteri qıyn boldy. Bir dýbldi birneshe ret qaıtaladyq. "Sharshaısyń, aýyr soqqy alamyn ba" dep qorqaqtaısyń. Sol sátter esimnen ketpeıdi.

Barlyq qalalarda túsirilim jasaldy, Túrkistanǵa kelgende 6 keli salmaq tastaǵanymdy uqtym. Jalpy daıyndalýǵa 3-4 aı ýaqyt berip, 2019  jyldan túsirilimdi  bastaǵanda budan da sátti shyǵar ma edi?!.

— Bekzattyń chempıon bolǵan sátinde qandaı sezimde boldyńyz?

— Sharshaǵandyqtan ba bilmeımin, "áıteýir erekshe sezimde boldym" dep aıta almaımyn. Biraq maǵan qatty áser etkeni, Bekzattyń rıngke shyǵyp bara jatqan sátii. Bekzat rıngke shyǵar aldynda telefon arqyly belgili sport jýrnalısi Amangeldi Seıthanovpen sóılesedi. «Men qazir jarysqa shyǵyp, jeńiske jetemin. Osy jeńisimdi Túrkistannyń 1500 jyldyǵyna arnaıtynymdy halyqqa jetkizińizshi» degen sózdi aıtady. Osyny aıtqan kezde kózime jas kelip, sóıleı almaı qaldym. Bir epızodty birneshe ret túsirdik. Osy sát maǵan qatty áser etti.

— Negizinde qazaq degen yrymshyl halyqpyz ǵoı. Alaıda bul róldi somdamas buryn qandaı da bir qorqynysh boldy ma?

— Joǵa, mende ondaı qorqynysh bolmady. Eger osy fılm arqyly jastardyń sportqa qulshynysyn arttyryp, júrekterine kishkene de bolsyn, patrıottyq sezimdi uıalatsam, armanymnyń oryndalǵany dep bilemin. О́mirde «pálenshe mynandaı rólden keıin qaıtys bolypty», -degen jaıttar kezdesetinin baıqaımyn. Alaıda muny  sáıkestik dep qabyldaımyn. Sebebi barlyǵy bir Qudaıdyń qolyndaǵy dúnıe. Otbasym da qarsylyq tanytpady, kerisinshe qoldaý bildirdi, qýandy. Mamandyǵymyz akter bolǵannan keıin obrazǵa kirip, halyqqa jetkizýdi maqsat tutamyz. Men Bekzat aǵamyzdy fılm arqyly qaıta «tiriltip», batyrdyń esimin umyttyrmaýǵa az bolsa da úles qosýdy ózime paryz sanadym.

— Fılm túsirý barysynda erekshe jaıttar oryn aldy ma?  Túsińizge Bekzat kirmedi me?

— Jalpy fılmniń túsiriletini týraly  2014 jyldan beri aıtylyp kele jatyr. Sol jyldary Bekzattyń áke-sheshesimen kezdesip, olardyń batasyn aldyq. Almatyǵa kelip, Ermek Shaıahmetovtyń Bekzat týraly fılm túsireıin dep jatqanyn estidik. Bul fılmde Asylhan Tólepov oınaıtyn boldy. Keıin osyǵan baılanysty bizdiń jumys ta toqtap qaldy. Alaıda bir aıdan soń Ermek Shaıahmetovtyń da fılmi óz jumysyn toqtatqanyn estidik. Aıtylǵan áńgime sol kúıi qalady. Soǵan qapalanyp júrdim. Asylhanǵa da «Sen oınasań da, men oınasam da, Bekzat týraly fılm báribir túsirilýi kerek edi ǵoı. Nege toqtap qaldy?», dep renishimdi bildirdim. Sol kezderi Bekzat aǵam túsime jıi kiretin.

— Jalpy sizdiń de sportqa qyzyǵýshylyǵyńyz bolǵan eken. Qashannan beri bokspen aınalysasyz?

— 2006-2007 jyldary kıkbokstan jastar arasynda 2 ret Qazaqstan chempıony boldym. Sol kezderi Bekzattyń tehnıkasyn jıi qoldanatynmyn. Boıym qarsylastaryma qaraǵanda uzyn. "Mektep bitire sala boksqa aýysamyn" dep josparlap júrgenmin. Alaıda alǵan jaraqatymnan keıin jaǵdaı ózgerdi. Amaldyń joqtyǵynan sportty tastaýǵa týra keldi. Sodan soń akterlyq mamandyqty tańdadym. Qazir Allaǵa shúkir, amanbyz. Armandar oryndalady, bári birtindep júzege asyp jatyr.

— Suhbatyńyzǵa raqmet!