Baqyt Týshaev: Aıtysta bılikke aıtylǵan bar syndy Arystanbek qabyldaı bildi

Sonymen bolǵanyna on kún bolǵan Astanadaǵy aıtystyń daqpyrty áli tolastar emes. Aıtystan keıingi el arasyndaǵy aıtystyń tipti báseńdeıtin túri joq. Árıne, aty jer jaryp turǵan jyldyń qorytyndy aıtysy bolǵandyqtan, onyń ústine jeńgen aqyn Altyn dombyranyń ıesi atanatyndyqtan, aqyndar baryn da saldy, janyn da saldy. Áleýmettik jelidegi áńgimege qaraǵanda aıtysta aıtylmaǵan áńgime qalmaǵan sııaqty. Eldiń muńyn muńdap, joǵyn joqtap, ashy shyndyǵyn aıtyp árbir aqyny aıanyp qalmaǵan eken.

Syrttan qaraǵan sol zaldaǵy halyqtyń tolqyny, aıǵaıyn kórip, dál osy aıtystyń anaý-mynaý oblysta emes, osy aıtystyń Astananyń tórinde ótýiniń ózi halyq pen bıliktiń bir-birine sál bolsa da jaqyn kelýiniń kórinisi boldy. Endi aqyndardyń sózine qaraǵanda bul aıtysty arnaıy bir demeýshiler ótkizip jatyr-aý degen oıǵa qaldyq. Keıin málim bolǵandaı, bul aıtystyń ótýine jáne demeýshilik jasaǵan úkimettiń ózi ekenin, onyń ishinde Mádenıet jáne sport mınıstrligi ekenin ári mınıstr Arystanbek Muhamedıuly ekenin bilgende tań qalǵanym ras. Ári Arekeńniń tapjylmaı otyryp, bir kún aıtys kórgendigi tipti kúmánimdi seıiltti. Endi ózi bılik ókili ári osy aıtystyń uıytqysy bolǵandyqtan.

Aqyndar tarapynan da, halyq tarapynan da aıtylǵan sóz qysymynyń Arystanbek Muhamedıulyn aınalyp ótpesi aqıqat. Dinde de aıtýshynyki súnnet, tyńdaýshynyki paryz degendeı, aıtylǵan dúnıeniń túıini, sol zalda otyrǵan bılik qaýymynyń jalǵyz ókili Arekeńe tireletindigi, búkil muń-zardy jalǵyz ózi kóterip, sóz qysymyna shydaı almaı sol zaldan shyǵyp ketpeı ári sabyr saqtap, aıaǵyna deıin kútkendigine óz basym rıza boldym. Iá, Rınattan bastap aqyndar soıqan aıtys jasady. Aıqaılap jeter jerine jetkizip aıtqan aqyndardan bastap, qıqýlap emosııaǵa berilip otyrǵan qasıetińnen aınalaıyn. 

Qara halyqtyń nalasynan Arystanbek myrza bolmasa, anaý-mynaý bılik ókili  aldy-artyna qaramaı taıyp turar ma edi, kim bilsin. Ol ol ma, osynaý eldiń muńyn qolyna dombyra alsa, tolassyz muńdaı jóneletin aqyndardyń eńbegi men erligin eskerip, toǵyz aqynǵa qatarynan «Mádenıet salasynyń úzdigi» ataqtarymen marapattaý – táýelsiz eldiń tarıhynda bolmaǵan qubylys. Qysqasy, bılik halyqpen jaqyn bolýy kerek degen qaǵıdany  ustanatyn kún jetti jáne osy jolda tynymsyz eńbek etip júrgen Arystanbek sekildi azamattardyń ustanymy ózge de atqa minerlerge sabaq bolsa eken. Al, jalpy únemi syn sadaǵynyń ótinde júrse de, tynymsyz eńbegimen at ústinde júretin Arekeń nendeı eńbegimen úzdik boldy deseńiz, ony da aıtaıyn. Bıylǵy jyldyń ózinde Mádenıet jáne sport mınıstrliginiń uıymdastyrýymen bıyl «Rýhanı jańǵyrý» aıasynda kóptegen ıgi sharalar isteldi. «Jahandyq álemdegi zamanaýı qazaqstandyq mádenıet» atty Qazaqstannyń mádenıeti men ádebıetiniń halyqaralyq forýmy tórt elde – Seýlde,  Londonda, Berlınde jáne Nıý-Iork qalalarynda ótti. Sonymen qatar el kúntizbesinde jańa mereke – Dombyra kúni engizilip, Mádenıet mınıstri Arystanbek Muhamedıuly ulttyq dombyra kúnin keń kólemde atap ótýge muryndyq boldy. Astanada alǵash ret atalyp ótken Dombyra kúnine elimizdiń túkpir-túkpirinen 2 myńnan astym kúıshi kelip qatysty. Jáne irili-usaqty, kózge kórinetin, kórinbeıtin qanshama eńbekteri bar. Bireýi bilse, bireýi bilmes degendeı.  Sondyqtan da óz basym Arystanbek Muhamedıulyna myqty densaýlyq, sátti qyzmet tileımin. Ulttyq óner aıtystyń da, kıno, teatr salasynyń da, sporttyń san alýan túrleriniń ósip-órkendeýine úlesińizdi qosyp júre berińiz.

Baqyt Týshaevtyń feısbýk paraqshasynan