Jastardy maqta terýge jegý Elbasynyń tapsyrmasy ma?

Myrzashól men Shardara óńirleriniń jergilikti halqyn qara jumysqa ǵana jegip qoıyp, jastar arasynda qoǵamdyq sanany jańǵyrtý isine mán bermeýdiń bolashaqtaǵy zardaby az bolmasy anyq.

Kezdeısoqtyq pa, álde Elbasymyz arnaıy tapsyrma berdi me, ol jaǵy bizge beımálim.

О́tken beısenbide elimizdiń birneshe ortalyq yqpaldy ulttyq saıttarynda bizdiń Myrzashól jáne Shardara óńirleriniń 500 myń halqyn elimizdiń qıyr túkpirinde, órkenıetten qashyqta qaldyrmaýǵa shaqyrǵan jáne Túrkistan oblysyn ekige bólip, Myrzashól, Shardara jáne Saryaǵash óńirlerindegi qala, aýdandardan elimizdiń 15-shi jańa Ońtústik Qazaqstan oblysyn qurýdy usynǵan maqalamyz jarııalanǵan edi.

https://www.qamshy.kz/article/mirzashol-shardara-zhane-sariaghash-onhirindegi-500-minh-xaliqti-oylap-zhanha-15-shi-oblis-qurayiq.html 

 

Maqalalar jaryq kórgen soń, arada bir apta ótpeı jatyp Qazaqstan Respýblıkasy premer-Mınıstriniń orynbasary, Aýyl sharýashylyǵy mınıstri О́mirzaq Shókeev pen Túrkistan oblysynyń ákimi Janseıit Túımebaev Maqtaaral jáne Jetisaı aýdandaryna jumys saparymen barypty.

Bul týraly aqparatpen qosa О́mirzaq Shókeev pen Janseıit Túımebaevtyń bir top maqta terýshilerdiń qasynda turyp túsken fotosýretterin aýdan ákimdikteriniń áleýmettik jelidegi paraqshalary men jergilikti resmı bılik qarjylandyryp otyrǵan buqaralyq aqparat quraldary jalaýlatyp jarııalap jatyr.

Osyǵan oraı, bizge mynadaı oı keldi.

Biz ózimiz týyp-ósken osy Myrzashól óńiriniń ıgerilý tarıhyn stýdent kezimizden beri sonaý patshalyq Reseıdiń otarlaý saıasatymen qurylǵan Túrkistan general-gýbernatorlyǵy tusyndaǵy 1867-1917 jyldardaǵy kezeńinen bastap, 1917-1991 jyldardaǵy keńes ókimetiniń maqta sharýashylyǵyn damyta otyryp, Myrzashóldegi rýhanııat salasyn qalaı kúıretkenin, sondaı-aq dál búgingi táýelsiz el bolǵan kezimizdegi jaǵdaımen salystyra otyryp, sarapqa salyp, zerttep kele jatyrmyz.

Tarıhqa tereńirek úńilsek, Túrkistan general-gýbernatorlyǵynyń bıleýshileri patshalyq Reseıdiń otarshyldyq múddesi úshin maqtany shıkizat retinde barynsha kóbirek óndirý jáne ony satyp, qarjy tabý maqsatynda Samarqan oblysynyń Qojent ýeziniń Iirjar bolysyn jáne Jyzaq ýeziniń Ataqorǵan, Kóktóbe, Qorǵantóbe, Pistelitaý jáne Shardara bolystarynyń aýmaqtaryn qonys etken Myrzashól óńiriniń qazaqtaryn qul sekildi jumsap, olardy barlyq qara jumystarǵa salyp, óz pıǵyldaryna paıdalandy.

Sol sekildi keńes ókimeti tusynda da (1917-1991 jyldar) sondaı solaqaı saıasat jalǵasyn taýyp, Myrzashól qazaqtaryn Máskeýdegi resmı bılik negizinen maqta egý, ony baptap-kútý jáne terý, oǵan qosa jibek qurtyn ósirip, memleketke tapsyrý sekildi negizinen azaby kóp, biraq naqty paıdasy az qara jumystarǵa qara jumys kúshi retinde qoldanyp keldi.

О́kinishke qaraı, Myrzashól jáne Shardara óńirleriniń jergilikti qarapaıym halqyn maqta sharýashylyǵyndaǵy qara jumys kúshi retinde paıdalaný saıasaty elimiz táýelsizdik alǵan 1991 jyldan beri qaraı da dál sol baıaǵy patshalyq Reseı men keńes ókimeti tusyndaǵydaı jalǵasyp kele jatyr.

Úkimetimiz Myrzashól jáne Shardara óńirlerine tek qana aýyl sharýashylyǵy salasynyń damýyn qamtamasyz etetin maqtaly ólke retinde ǵana qaraıtyn birjaqty ustanymdy basshylyqqa alýyn túbirimen qate saıasat dep esepteımiz.

Aıtpaqshy, biz Myrzashól jáne Shardara óńirleriniń 500 myń halqyn elimizdiń qıyr túkpirinde, órkenıetten qashyqta qaldyrmaýǵa shaqyrǵan jáne Túrkistan oblysyn ekige bólip, Myrzashól, Shardara jáne Saryaǵash óńirlerindegi qala, aýdandardan elimizdiń 15-shi jańa Ońtústik Qazaqstan oblysyn qurýdy usynǵan hatymyzdy Qazaqstan Respýblıkasy Premer-Mınıstriniń orynbasary - Aýyl sharýashylyǵy mınıstri О́mirzaq Shókeevtiń atyna da joldaǵan edik.

Osy hatymyzǵa О́mirzaq Shókeevten: «Atalǵan másele Aýyl sharýashylyǵy mınıstrliginiń quziretine kirmeıdi», - degen jalǵyz aýyz sóz jazylǵan resmı jaýap alǵanbyz.

Úkimetimizdiń mundaı birjaqty ustanymynyń saldarynan Myrzashól jáne Shardara óńirinde turyp jatqan 500 myń qarapaıym qara halyq qazirgi zamanǵy órkenıettiń damý úrdisinen múldem artta qalyp qoıyp otyr.

Myrzashól jáne Shardara óńirinde turyp jatqan 500 myń qarapaıym qara halyqtyń bolashaq urpaqtary – ul-qyzdary men nemere-shóbereleri de basqalar sekildi sapaly bilim alýy, mádenıet pen órkenıettiń osy zamanǵy ozyq túrlerin ıgerýi kerektigi Úkimetimiz ben Túrkistan oblysy basshylarynyń nazarynan múldem tys qalǵanyn ashyq aıtýymyz kerek.

Elbasymyz N.Á. Nazarbaevtyń arnaıy Jarlyǵymen bekitilgen «Qoǵamdyq sanany jańǵyrtý» baǵdarlamasyn júzege asyrýǵa Myrzashól jáne Shardara óńirleriniń jergilikti resmı bıligi múldem nazar aýdaryp otyrǵan joq!

Túrkistan oblysynyń, onyń ishinde Maqtaaral, Jetisaı jáne Shardara aýdandarynyń ákimdikteri turǵyndardy maqta men qaýyn-qarbyz ósirýge jumyldyrý isine kóbirek kóńil bóledi de, qarapaıym qara halyqtyń rýhanı muń-muqtajdaryna onsha mán bermeı kele jatyr.

Kem degende 500 myń halyq turatyn Túrkistan oblysynyń ortalyǵynan 250 shaqyrym qashyqtyqta qalyp qoıǵan túkpirdegi ólkede Myrzashól jáne Shardara óńirinde ulttyq mádenıetti ilgeriletý, azamattardyń, ásirese jastardyń boıynda bilimge qushtarlyqty qalyptastyrý sekildi memlekettik saıasatty júzege asyrýǵa jergilikti bılik oryndarynyń bulaısha nemquraıdy qaraýynyń bolashaqtaǵy saldary da jaqsy bola qoımaıtyny belgili.

Qysqasy, Úkimetimiz ben Túrkistan oblysynyń ákimdigi Myrzashól jáne Shardara óńirleriniń jergilikti qarapaıym halqyna tek qana qara jumys kúshi dep qaramaı, naqty adamdarmen, ásirese jastarmen rýhııat salasynda júıeli jumys istep, túkpirde qalyp otyrǵan osy ólkede Elbasymyz N.Á. Nazarbaevtyń arnaıy Jarlyǵymen bekitilgen «Qoǵamdyq sanany jańǵyrtý» baǵdarlamasyn júzege asyrý isin myqtap qolǵa alýy tıis.

Myrzantaı Qojabaıuly Jaqyp,

L.N. Gýmılev atyndaǵy Eýrazııa ulttyq ýnıversıteti Teleradıo jáne qoǵammen baılanys kafedrasynyń dosenti (of Associate Professor),

fılologııa ǵylymdarynyń kandıdaty (PhD),

«Zertteýshi» Respýblıkalyq ǵylymı-bilim berý ortalyǵy» mekemesiniń dırektory