Kentaý qalasynyń ekonomıkasyna 8,3 mlrd teńgege ınvestısııa tartylady

Kentaý qalasynyń ekonomıkasyna ótken jyly 6,5 mlrd teńge kóleminde ınvestısııa tartylsa, bıyl ol mejeni 8,3 mlrd teńgege jetkizý kózdelip otyr. Onyń ishinde bıýdjet qarajaty esebinen - 6 mlrd. teńge jáne jeke qarjylar esebinen 2,3 mlrd teńge bolmaq. Búgin bul týraly OQO óńirlik kommýnıkasııalar qyzmetinde ótken brıfıngte Kentaý qalasynyń ákimi Ábdibaqyt Maqulbaev málim etti.

Byltyr óńirde ónerkásip salasynda 28,1 mlrd teńgeniń ónimi óndirilip, naqty kólem ındeksi 107,2 paıyzdy quraǵan.

«Indýstrıaldy aımaqta 2 mlrd teńgege segiz jobany iske asyrý josparlanǵan. Búginde 2 joba tolyq iske qosylyp, 798 mln teńgeniń ónimi óndirildi.  Qosymsha 2 jobanyń qurylys jumystary tolyǵymen aıaqtalyp, jyl sońyna deıin iske qosylady. Qalǵan 1 jobanyń qujattary saraptamadan ótip, aǵymdaǵy jyldyń I toqsanynda qurylys jumystary bastalady. Nátıjesinde 50-ge jýyq jańa jumys oryndary qurylady», - dedi Ábdibaqyt Tillábaıuly.

Qalǵan úsh joba boıynsha óńirlik úılestirý keńesine qujattardy tapsyrý, kelisý jáne rásimdeý jumystary júrgizilýde. Úsh kompanııa polımetall jáne barıt rýdalaryn qaıta óńdeý, óńdirý jumystaryn iske asyratyn bolady.

Sonymen qatar, «QR ındýstrıaldyq-ınnovasııalyq damytýdyń 2015-2019 jyldarǵa arnalǵan» memlekettik baǵdarlamasy aıasynda búginde aımaqta jalpy quny  4,4 mlrd teńge quraıtyn bes joba tolyq qýattylyqqa shyǵyp, 5,4 mlrd. teńgeniń ónimi óndirilgen.

Budan ózge, Kentaý qalasynda qazirgi tańda jumys istep turǵan shaǵyn orta kásipkerlik sýbektileriniń sany - 2953.  Bul ótken jylmen salystyrǵanda 6,8 paıyzǵa óskendigin kórsetedi.

«Atalǵan salada óndirilgen ónim kólemi 18,9 mlrd teńgege jetip, 7,6 paıyzǵa kóbeıgen. Aldaǵy ýaqytta shaǵyn jáne orta bıznes salasynda 136 jobaǵa 422 mln teńge kóleminde nesıe berý josparlanyp otyr.  Jalpy osy baǵytta 700-ge jýyq turaqty jumys orny ashylatyn bolady», - dedi Ábdibaqyt Maqulbaev.                     

Aıta keterligi, óńirde ótken jyly memlekettik baǵdarlamalardy júzege asyrý maqsatynda qarjy ınstıtýttary arqyly 259 mln teńgege 95 joba qarjylandyrylyp, nátıjesinde 150-ge jýyq azamat jumyspen qamtyldy.