Kezekten tys Prezıdent saılaýy. Qoǵam qaıratkerleri ne deıdi? (saýalnama)

Qazaqstanda "kezekten tys Prezıdent saılaýy ótýi múmkin" degen aqparat barlyq  BAQ betterinde keńinen taraldy. Bul áleýmettik jelilerde qyzý talqyǵa túsip, túrli pikirler aıtyla bastady. Osyǵan baılanysty Qamshy.kz portaly qoǵam qaıratkerleri men zııaly qaýymnyń pikirin bilgen bolatyn.

Baqytbek Smaǵul, Májilis depýtaty:

– Jalpy Qazaqstan halqy Assambleıasy usynyp otyrǵan bul bastamany barsha halyq qoldaıdy dep oılaımyn.  "Máńgilik el", "Nurly jolda" aıtylǵandaı halyqtyń ustanymy - tynyshtyq, beıbitshilik, tatýlyq. Elbasynyń elimizdiń damýy jolynda jasaǵan eńbegi ólsheýsiz. Muny jańsaq túsinýge bolmaıdy. Qazaqstan halqy Assambleıasy  óz upaıyn túgendeý úshin emes, eldiń tynyshtyǵy, jarqyn bolashaqqa baǵyt alǵan Jas Qazaqstannyń bolashaǵyn oılanaǵdyqtan osyndaı bastamany usynyp otyr dep túsiný kerek. Biz Aýǵan soǵysy ardagerleri árqashan Elbasyn qoldaımyz, qoldap qana qoımaı qorǵaımyz da. Shyndap qarasańyz, aınalamyzdaǵy kórshiles elder qansha jerden kúlip qarap otyrǵanymen, bir saýsaǵyn ishine búgip otyrǵany anyq. Osyndaı saıası soǵys, aqparattyq soǵys kezeńinde biz jumylǵan judyryqtaı bolyp, bir aýyzdan Elbasyn qoldaýymyz kerek. Jáne mynany bile júrgen abzal. Prezıdentke baǵyný-oǵan tabyný emes, saıasatyn qoldaý-jaǵyný degen sóz emes. Demokratııalyq elde ómir súrip otyrǵan soń, kez kelgen úmitker saılaýǵa qatysa alady, árıne. Biraq, 98 paıyz halyq Elbasyn qoldaıdy dep senimmen aıta alamyn.

Asly Osman, Qoǵam qaıratkeri:

– El basqarý, basshyny taǵaıyndaý, bul óte mańyzdy, jaýapkershilikpen qaraıtyn sharýa. Buǵan atústi qaraı salýǵa bolmaıdy. Qazirgi tańda Elbasy sekildi shyn mánindegi daryndy saıasatker, úmitker joq. Sondyqtan men, árıne, Elbasyn qoldaımyn.

Qasym Amanjoluly, jýrnalıst:

– Saılaý bolady. Nátejıesi de belgili. Assambleıa bastap, "Nur Otan" qostap, taǵy qaptaǵan jurt japa tarmaǵaı jalynyp jatyp Prezıdentti kezekten tys saılaýdy jarııalaýǵa kóndiremiz. Sosyn, Nazarbaev taǵy bir márte 98 paıyz daýys alyp, el senimin jáne bes jyl arqalaýǵa kelisedi.

Zaǵıpa Balıeva, Májilis depýtaty:

– Bul bastamany tolyq quptaımyn. Oǵan birneshe obektıvti sebep bar. Qazaqstan halqy Assambleıasynyń usynysyna nazar aýdarý kerek.  Mysaly 2011 jyly Prezıdent jáne Parlament saılaýy bir mezette kezekten tys ótkeni málim. Prezıdenttiń "Nurly jol - 2020" bastamasy da orta jolda, aıaqsyz qalmaýy kerek dep oılaımyn.  Sondaı-aq, elde krızıs bolmaǵanymen, syrtqy faktorlar bar. Osyndaı qysyltaıań kezeńde Prezıdetti kezekten tys saılap alsaq,  aldaǵy bes jylda saıası turaqtylyqty saqtap qalýǵa bolady.

Aıdos Sarym, saıasattanýshy:

– Árbir saılaý eldiń, saıası elıtanyń, saıası urandardyń jańarýyna alyp kelýi qajet. Saılaýdyń basty muraty men mindeti osy. Eger osyǵan qol jetkize alar bolsaq, aldaǵy saılaý óziniń maqsat-mindetin oryndady dep aıta alamyn.

Jambyl Ahmetbekov, QKP múshesi, májilis depýtaty:

– Kez kelgen saıası partııa tosyn ózgeristerge, sonyń ishinde saılaý prosesine daıyn bolýy kerek. Biz de Halyqtyq kommýnıster partııasy Qazaqstan Halqy Assambleıasynyń bul bastamasyn toyqtaı quptaımyz.

Rasýl Jumaly, saıasatnaýshy:

– Osy jolǵy kezekten tys saılaýdan aıtarlyqtaı jańalyq, ne ózgeris kórip otyrǵanym joq. Mundaı saılaýlar buǵan deıinde bolǵan. Bul saılaýǵa da ádettegideı balama úmitkerler qatysary anyq. Biraq ol qorytyndy nátejıege esh áserin tıgizbeıdi. Al bıylǵy saılaýǵa úmitkerlerge keletin bolsaq, M.Eleýsizovtyń esimi estilip qaldy. Jáne ózderi tarapynan, saıası partııalardan úmitkerler bolýy múmkin. Biraq, oppazısııa tarapynan ortaq bir úmitker bolýy neǵaıbyl. Sebebi bizdegi bytyrańqy oppozısııa saılaý aldynda birige qoımasy anyq. Sondyqtan olardan birneshe úmitker bolyp qalýy yqtımal. Biraq, munyń bári qorytyndy nátıjege yqpal ete almaıdy.

Eske sala keteıik, 14 aqpan kúni Qazaqstan halqy Assambleıasy keńesi músheleri Qazaqstanda kezekten tys saılaýdy ótkizý týraly bastama kótergen.

“Qamshy” silteıdi