«Jastar» teatrynda jańa qoıylym

Jastar teatry 2017 jyldyń 21 mamyr kúni J.Somjúrektiń «Tilep-Saryqyz»   tragedııasynyń  premerasyn ótkizedi. Qoıýshy rejısser: Qazaqstannyń eńbek sińirgen qaıretkeri Nurqanat JAQYPBAI

HVIII ǵasyrdyń ekinshi jartysynda ómir súrgen áıgili kúıshi Tilep Aspantaıuly – qazaqtyń qońyr úndi qobyzynyń qulaǵynda oınaǵan teńdesiz talantymen ǵana emes, ańyzǵa bergisiz talaıly taǵdyrymen de el esinde esimi eleýli tulǵa.

Ataqty Qoılybaı baqsydan kúı úırenip, talantyn shyńdaǵan Tileptiń shyǵarmashylyǵynyń sharyqtaý shyńy – tikeleı Saryqyz sulýdyń esimimen baılanysty. Kıeli qobyz úni tabystyrǵan qos ǵashyqtyń armanda ketken kelte baqyty qanshalyqty qasiretti bolsa, birin-biri qulaı súıgen kirshiksiz sezimi sonshalyqty aıaýly. Kıeli aspaptyń qońyr úninen tamyr tartar ólmeıtin mahabbat hám keler urpaq úlgi tutar tektilik – Tileptiń  Saryqyzǵa arnaǵan ǵajaıyp kúıi bolyp, ortamyzǵa oralyp otyr.

Búginde Astananyń tórinde qobyzshynyń urpaǵy, belgili arhıtektor Sapar Ysqaqulynyń qolymenen boı kótergen sáni men saltanaty kelisken  «Tilep qobyz» saraıy– Tilep pen Saryqyz mahabbatyna qoıylǵan máńgilik eskertkish belgisindeı bolyp, keleshek urpaqtyń boıyna kıeli qobyzdyń taǵylymyn darytyp,  jastardy shynaıy sezimge tárbıelep keledi.