BILIK OŃTÚSTIKTEN SOLTÚSTIKKE QONYSTANDYRÝ DEŃGEIIN ARTTYRÝDY MYQTAP QOLǴA ALMAQ

Elbasy keshegi Ońtústik Qazaqstan oblysyndaǵy sapary barysynda jergilikti jurtshylyqpen kezdesýinde ońtústikten soltústikke qonystandyrý deńgeıin arttyrý jóninde sharalar qabyldaýdy tapsyrdy.

– Baǵdarlama sizderdiń de oblystaryńyzda qoldanylady. Men sizderdiń eńbekqor halyq ekenderińizdi jaqsy bilemin. Soltústik, shyǵys óńirlerge qonys aýdaryp, elimizdiń damýy men bolashaǵyna zor úles qosyp kelesizder. Osy baǵyttaǵy jumysty jalǵastyrý kerek. Oblys ákimine Úkimetpen birlesip, halyqty jumyspen qamtý jáne ony qonystandyrý deńgeıin arttyrý jóninde sharalar qabyldaýdy tapsyramyn, – dedi Memleket basshysy.

Al, búgin Astanada Eńbek jáne halyqty áleýmettik qorǵaý mınıstri Tamara Dúısenova da halyqty ońtústikten soltústikke kóshirýdiń jalǵasatynyn «Nur Otan» partııasynyń bastamasymen ótken jıynda málimdedi.

Bıyl 2700 azamattyń qonys aýdarýyna sýbsıdııa bólingen. Bul baǵdarlama eńbek resýrstaryn aımaqtarda tıimdi paıdalanyp, demografııalyq teńdikti saqtaýǵa baǵyttalǵan. О́ıtkeni, ońtústik óńirde halyq tyǵyz ornalasqan. Sondyqtan, balabaqsha, mektepterde oryn tapshylyǵy, jumyssyzdyq deńgeıi joǵary. Al teriskeıde kerisinshe, qalaǵa jappaı kóshýdiń saldarynan eldi mekender bos qalyp jatyr. Sondyqtan, jınalǵandar mınıstrlikke bul baǵyttaǵy jumysty kúsheıtip, olqylyqtardyń ornyn toltyrý kerektigin jetkizdi. 

Aıta ketsek, Ońtústik halqyn soltústikke qonystandyrý baǵdarlamasyna 2017 jyly 85 mlrd. teńge bólingen bolatyn. Bul týraly 10 aqpanda Astanada «Korporatıvtik sektorda áıelderdiń múmkindigin keńeıtý» atty halyqaralyq forýmda QR Eńbek jáne halyqty áleýmettik qorǵaý mınıstri Tamara Dúısenova málim etken edi.

Elbasy Nazarbaev ótken jyly 9 qyrkúıekte Úkimette ótken jınalysta da ońtústik halqyn soltústikke qonystandyrý týraly aıtqan edi. «Eńbek utqyrlyǵy boıynsha  jumys berýshi men jumysshylarǵa birin-bir tabýǵa kómektesý  qajet. Osyǵan baılanysty biz «Serpin» degen jobany iske asyryp jatyrmyz ǵoı. Ol halyq tyǵyz turatyn óńirlerdiń jastaryna bilim berip, olardy  kadr tapshy aımaqtarǵa jumysqa ornalastyrýǵa  múmkindik beredi. Qazirdiń ózinde mendegi bar derekterge sáıkes 12,5 myń jas maman oqý oryndarynda daıyndalyp jatyr. Munan ózge 20 myńdaı adam «Jumyspen qamtý jol kartasy» boıynsha eńbek kúshi tapshy aýdandarǵa kóshirildi»,-  degen bolatyn Elbasy. Osy sózinde QR Prezıdenti soltústiktegi kásiptik-tehnıkalyq oqý oryndarynyń úshten bir bos turǵanyn qaperge salyp ońtústik jastaryn soltústikke qonystandyrý jumystaryn jandandyrýdy aıryqsha tapsyryp edi.

Baıqaǵanymyzdaı prezıdenttiń atalǵan máseleni birneshe ret qadap aıtýy osy saıasatqa memlekettiń úlken salmaq salyp otyrǵanyn kórsetedi. Sondaı-aq shetelden oralǵan etnıkalyq qazaqtardy da soltústik oblystarǵa qonystandyrýdyń memlekettik baǵdarlamasy ázirlengen. Bul baǵdarlamalar óz kezeginde qazaq eliniń damýy men órkendeýine úlken úlesin qosatyny sózsiz.

Nurǵalı NURTAI