KHDR-dan qashqan qyzdar Ońtústik Koreıaǵa kelip shyndyqty aıtýdan qoryqpady

«Saǵan asyqpyn» dep atalatyn baǵdarlama KHDR-dan qashyp shyqqan káristerdiń ótken ómirlerin, bastan ótken oqıǵalaryn, kórgen qıyndyqtary men tartqan azaptary, ózekti órtegen ókinishteri men qýanyshtary jaıly baıandaıtyn realıtı-shoý dep habarlaıdy Qamshy aqparattyq agenttigi.

1990-shy jyldardan bastap Soltústik Koreıanyń 23000 turǵyny ońtústikke qashyp kelgen eken. «Saǵan asyqpyn» shoýynyń maqsaty eki eldiń ómirin salystyrý, kórermenge oı salý. Búginde KHDR-dyń 15 turǵyny atalmysh baǵdarlamanyń keıipkerine aınalyp úlgerdi. Shoýǵa túsken árbir azamat Koreıada tanymaldylyqqa ıe.

Djý Chanıang – Soltústik Koreıanyń burynǵy azamaty. Ol dıktatorlyq tártipte ómir súretin elinen qashyp shyǵý úshin temeki men shulyqty satýǵa májbúr bolǵan.  Ol 3000 km. shaqyrymdy «ustalynyp qalamyn» degen qorqynysh-úreımen júrip ótken. Búginde ol kók jáshiktiń juldyzy. Ony kórý úshin myńdaǵan jankúıer Seýldiń kóshelerinde jınalyp, kútip turady eken. Djý Chanıang esimdi keıipker realıtı-shoýǵa 2012 jyldan bastap qatysyp keledi. Ol júzdegen epızodqa túsip úlgergen. Eldegi tanymaldylyǵyna qaramastan, ol óziniń qarapaıym qyz retinde sezinedi eken. О́ziniń aıtýynsha, qarapaıym biraq televıdenıe úshin asa kórikti emes qyz.  «Men ózimdi keremet aktrısamyn dep oılamaımyn. Ońtústik Koreıa jastary KHDR-daǵy ómirge qyzyǵa bastaǵandaryna qýanyshtymyn. Ýaqyt óte kele, bárimiz bir halyq ekenimizdi túsinemiz degen úmittemin» deıdi Djý.

Ara Kım bolsa teatr kolledjin bitirip, Kım Chen Yn úshin óner kórsetetin qupııa mýzykalyq toptyń múshesi bolǵan qyz.  

«Saǵan asyqpyn» shoýynyń sıýjeti boıynsha keıipker qyzdar óz Otandarynda qalaı qınalǵandaryn, KHDR-da ekiniń biri plastıkalyq ota jasaǵysy keletindikterin, er adamdar áıel adamdarmen emin-erkin sóılesýge qulyqty emestikterin, qoǵamdaǵy birtúrli túsinik pen erejeler jaıynda aıtyp berýleri tıis.

Sý Reıon esimdi keıipker anasy qaıtys bolǵanda tabytqa aqsha tappaǵandyqtan anasynyń denesin kórpege orap jer qoınyna tapsyrǵandyǵyn aıtyp berdi.

«Kım Ir Sen qaıtys bolǵanda onyń uly kesene turǵyzý úshin mıllıondaǵan dollar jumsady. Al bizde jaı tabytqa aqsha bolǵan joq. Munyń bári ádiletsizdik» deıdi Sý Reıon.

Daıyndaǵan: Jazıra Baıdaly