Názııa Joıamergenqyzy: STALINNEN AINALAIYN!

  QR Qylmystyq kodeksiniń jańa zań jobasy alǵashqy oqylymda qabyldandy. Sol qujatta jýrnalısterdi "jala jabý" degen bap boıynsha 3 jylǵa deıin bas bostandyǵynan aıyrýǵa quqyq berilgen. Iаǵnı, eger jazǵan maqala, jýrnalıstik zertteýińizge qatysy bar bir kisi sizdi "jala japty" dep oılasa, sotqa beredi. Eger sot qajet dep tapsa, 3 jylǵa sottalasyz. "Eshbir JÝRNALIST syrt qalmasyn, qol jınaıyq, daýysymyz shyqpaı jatyr. Bul BAQ ókilderine tóngen qaýip" dep qaqqan dabylymdy biraz saıt kóshirip basty. Sóıtsem, "qonaq" degen atpen attandaǵan bir sorly "memlekette otyrǵandar aqymaq pa? Nege tynysh júrmeısiń?! Sen sııaqty aqyly kelteler nege azaımaıdy?!" dep pikirsymaq qaldyrypty. Kim ekenin bilmeımin, eger qajet dep tapsam, ony ońaı tabýǵa bolady ǵoı. Aıtaıyn degenim, sol sorly eger jýrnalıst bolsa, túrmege otyrady. Al qarapaıym jan bolsa, ózi, týǵany, áke-sheshesiniń basyna kún týsa, mindetti túrde jýrnalıske kelip muń shaǵady, arasha tús deıdi. Al basyna is túsken adamǵa 3 jylǵa deıin sottalýy múmkin jýrnalıst qalaı kómektesedi? Ne degen topastyq?! KSRO kezinde Stalın: "Eger jýrnalıst jazǵan maqalanyń, aıtqan sózdiń 5 paıyzy shyndyq bolsa, qýdalaý bolmasyn jýrnalısterdi" deıtin. Al qazir 100 paıyz shyndyq bolsa da, jýrnalıster dármensiz. Jeke basynyń, otbasy men týǵandarynń qaýipsizdigi taǵy bar. Bul qoǵam ádildikke emes, ádiletsizdikke, tizege salatyndar men jemqorlarǵa, qolyndaǵy bıligin asyra paıdalanatyndarǵa ǵana arnalǵan sııaqty kórinedi keıde. Qanisher Stalındi, qazaqty qyrǵan Stalındi ıttiń etinen jek kórem. Biraq mamandyǵyma kelgen tusta: "Stalınnen aınalaıyn!" demeske sharań joq...