Dinı ekstremızm men terrorızmge qarsy kúres máselelerine qatysty semınar ótti

Qazirgi ýaqytta dinı ekstremızm men terrorızmge qarsy kúres máselelerine erekshe kóńil bólinýde. Bul taqyryp ózektiligin joǵaltpaıdy, óıtkeni qazirgi álemde adamzat úshin kúrdeli problemaǵa aınalǵan terrorızm men ekstremızm sııaqty qubylystardyń kóbeıýi baıqalady. Osy faktordy eskere otyryp Almaty qalasy Din isteri jónindegi basqarmasynyń qoldaýymen «Adam jáne qoǵam» úkimettik emes uıymynyń uıymdastyrýymen Dinı ekstremızm men terrorızmniń aldyn alý boıynsha 16-17 mamyr kúnderi aralyǵynda, bilikti teologtardy, dintanýshylardy, sarapshylardy, psıhologtar men fılosoftardy tarta otyryp, Almaty qalasynyń 100-ge jýyq jalpy bilim berý mekemeleri men kolledjderdiń muǵalimderine arnalǵan 12 saǵattyq oqytý semınary ótkizildi.

Semınar barysynda mamandar tarapynan destrýktıvti dinı aǵym ıdeologııasynyń qoǵamǵa qaýiptiligi jáne oǵan qarsy qoldanylatyn dálelder men ádis-tásilder, zaıyrlylyq túsinigi, ǵalamtor keńistiginde kúmándi dinı aqparattardyń taralýyn boldyrmaý jáne oǵan qarsy tıimdi nasıhattyq jumystardy júrgizý ádisteri jáne t.b. din salasyna qatysty mańyzdy aqparattar berildi.

«Búgingi kúni din salasyndaǵy memlekettik saıasattyń negizgi baǵyttarynyń biri dinı ekstremızm ıdeologııasynyń taralýynyń aldyn-alý, dástúrli emes dinı ıdeologııanyń taralýyna qarsy nasıhat jumystaryn júrgizý bolyp tabylady. Dinı ekstremızm ıdeologııasynyń taralýymen kúres barlyǵymyzdyń ortaq jumysymyz bolǵandyqtan, jalpy bilim berý mekemeleri men kolledjderdiń muǵalimderi  osy semınardan orasan tájirıbe alyp, jumystarynda tıimdi paıdalanady degen oıdamyz», - dedi Din isteri jónindegi basqarmasy basshysynyń orynbasary Erǵalı Kósheke.   

Mamandar qatysýshylarmen qajetti aqparattarymen bólisip, dinaralyq toleranttylyq qundylyqtaryn bekitý jáne ekstremızmniń aldyn alý asa mańyzdy másele ekendigin jetkizdi.

«Qatysýshylarǵa destrýktıvti dinı aǵymdardyń erekshelikteri, ekstremıstik jáne terrorıstik uıymdarǵa tartýdyń psıhologııalyq ádisteri týraly aıtyldy. Sondaı-aq, qoǵamdyq qaýipsizdikti saqtaý jáne memlekettiń órkendeýi úshin konfessııaaralyq kelisimniń mańyzdylyǵy jaıly atap ótildi», - dedi oqytý semınarynyń lektory «Nur-Múbarak» Egıpet ıslam mádenıeti ýnıversıteti, Dinı ekstremızmge qarsy is-qımyl ortalyǵynyń dırektory- Tımýr Núsiphanuly

Oqý semınarynyń qorytyndysy boıynsha qatysýshylar arnaıy sertıfıkattarmen marapattaldy.