SIM Qytaı azamattarynyń Qazaqstan aýmaǵynda vızasyz júrýine baılanysty resmı saýalǵa jaýap berdi

Qytaı, Úndistan jáne Iran azamattary úshin Qazaqstan aýmaǵynda 14 kún vızasyz júrýine ruqsat berilgen. Osyǵan baılanysty Qamshy.kz aqparat agenttigi Syrtqy ister mınıstrligine resmı hat joldady. 

Syrtqy ister mınıstrligi vızalyq tártipti jeńildetý elimizdegi ınvestısııalyq ahýaldy jaqsartyp, úsh memlekettegi seriktesterimen aradaǵy  baılanysty nyǵaıtý úshin qajet ekenin aıtty. 

"Sondaı-aq bul rejım Qazaqstanǵa keletin týrıster aǵynynyń ósýine jáne ózara mádenı almasýdy yntalandyrýǵa yqpal etýge baǵyttalǵan. QHR azamattary úshin 14 kúndik vızasyz bolý tártibi buryn qoldanysta bolǵan 3 kúndik vızasyz tranzıt tájirıbesi negizinde belgilengenin atap ótken jón. Bul tártip 2017 jyly "EKSPO-2017" halyqaralyq kórmesin ótkizý kezeńinde engizildi", dep jaýap berdi SIM. 

Mınıstrlik óz jaýabynda vızasyz rejımge qatysty kelisim jobasy áli de talqylanyp jatyrǵanyn habarlady. 

"Qazirgi ýaqytta taraptarmen talqylanyp jatqan kelisim jobasy eki memleket azamattaryna tepe-teńdik qaǵıdatyna sáıkes azamattyq pasporttar ıelerine ózara vızasyz saparlarǵa jaǵdaı jasaýdy kózdeıdi. Vızasyz tártipti engizý máselesin pysyqtaý QR azamattarynyń týrıstik, iskerlik, týysshylaý jáne emdelý maqsattarmen Qytaıǵa barýǵa degen joǵary suranysyn qanaǵattandyrý qajettiliginen týyndady. Osyǵan baılanysty QR Syrtqy ister mınıstrligi tarapynan sheteldik saparlardy júzege asyrý kezinde QR azamattaryna barynsha qolaıly jaǵdaı jasaý úshin barlyq sharalar qabyldanýda", delingen resmı jaýapta.