Foto: informburo.kz
Qańtar oqıǵasy boıynsha "Aýyr saldarǵa ákelip soqqan qyzmettegi áreketsizdik" baby boıynsha aıyptalǵan Almaty oblysy polısııa deportamentiniń burynǵy basshysy Serik Kúdebaevtyń sotynda kýáger buǵan deıin taraǵan aqparatqa qarama-qaıshy keletin derekterdi aıtty.
5 qańtarda parlamentte bas prokýratýra kórsetken vıdeoda Serik Kúdebaev qyzmettik ornyn tastap ketip bara jatqan kadr bar. Al sot otyrysyna kýáger retinde qatysqan arnaıy jasaq shtabynyń leıtenanty Aıgúl Nurmuhanova Kúdebaev 2022 jylǵy 4 qańtarda kóppen birge strategııalyq nysandardy qorǵaýǵa qatysqanyn aıtady. Kýáger sózin informburo.kz. saıty keltirgen.
Kýáger 2022 jyldyń 4 qańtarynda ákimdiktiń aldyna birneshe adam kelgenin, alańǵa arnaıy jasaq jınalyp, prokýror men ákim sóz sóılep, narazy azamattardy taratýǵa tyrysqanyn aıtady. Mıtıngke shyqqandardyń keıbiri tarasa, keıbirin polıseler ustaǵan. Osydan soń arnaıy jasaqty alańnan alyp ketken.
"Biz de sol jerde boldyq. Taǵy da mıtıng bolýy múmkin ekeni eskertildi. Sol sebepti daıyn bolyńdar degen buıryq tústi. Men is-qaǵazdarmen jumys isteıtinmin. Jumystan shyqqanǵa deıin narazy halyq sany kóbeıdi. Alańǵa bara jatqan kezde Ishki ister basqarmasynyń janynan óttim. Alańǵa kirý múmkin emes edi. 102-ge habarlasyp narazylyqqa shyqqandardyń shabýyl jasap jatqanyn aıttym. Olar barlyq quqyq qorǵaý organy qyzmetkerleri alańda ekenin aıtty", dedi Aıgúl Nurmuhanova.
Kýáger alańda tártipsizdikti uıymdastyrǵan 4 adamdy baıqaǵanyn jetkizdi. Olar únemi telefonmen sóılesip, alańǵa adam jınaǵan.
"Bir top adam Ulttyq ulan sarbazdaryna tas laqtyryp, shabýyl jasady. Sol kezde meniń janymnan bir er adam ótip ketti. Ol – ákimniń orynbasary edi. Tobyr ony kóre sala shabýyl jasap, uryp-soǵa bastady. Úsh jigitpen birge ákim orynbasaryn qorshap alyp, súırep alańnan shyǵardyq. Alańnan shyqqan soń ákimshilik jaqqa qaraı júgirdim. Sol ýaqytta adamdar tas laqtyryp, ǵımaratty qıratyp jatty. Tý ustaǵan adam shyǵyp, Ishki ister deportamentin qırataıyq dep aıǵaılady. Adamdar qolyna qalqan ustap, oq ótkizbeıtin jelet kıip alǵan. Osy sátte vzvod komandıri Rýslan Tóstekbaevty kórdim. Onyń jaǵy synyp, jaraqat alǵanyn baıqadym. Ony sarbazdardyń biri qutqardy", dep jaýap berdi arnaıy jasaq ókili.
"Men komandırge esep berdim. Ol bazaǵa baryp, qorǵanysty kúsheıtý kerek dep buıryq berdi. Keıin birneshe dıspetcherlik mashına men azamattyq mashınany toqtattym, biz bazaǵa bardyq. Biz qarýlaný úshin PD-ǵa barý komandasyn aldyq. Barlyq jigitterge jaýapty bolǵandyqtan olarǵa azamattyq kıim kııýge tapsyrma berdim. Biz qarý-jaraq alý úshin polısııa deportamentine barýymyz kerek boldy. 4 qyzmetkerdi ózimmen birge alyp kettim. Al qalǵan tórteýin ákimshilikke jiberdim. Polısııa deportamentine kelgen kezde kólikter órtenip, qırap jatty", deıdi kýáger.
Shtab leıtenanty bir sarbaz qaza tapqany jóninde habar alǵan. Artynsha búlikshiler aýrýhanany órtegeli jatqanyn estigen sol aýrýhanaǵa jol tartqan.
"Alańdaǵy barlyq qyzmetkerler soqqyǵa jyǵyldy. Serik Kúdebaev sol kezde bizben birge boldy. Men onyń ómirin qaýipke tigip, qan-josa kúıde bizben birge kúreskenin kórgen soń oǵan degen qurmetim artty. Siz qurmetke laıyqsyz", dedi Aıgúl Nurmuhanova.
Kýáger Kúdebaevtyń alańda jaraqat alǵanyn, aqqan qandy qandy ózi toqtatqanyn júrgizýshisinen estigenin jetkizdi.
"Polısııa deportamentine barǵan kezde ǵımarat ishi qarańǵy boldy. Ǵımarattyń ishinen bir polısııa qyzmetkeri men bir sarbazdy taptym. Sosyn kóshede eki áıel qyzmetkerdi taptym. Bireý aýrýhanada, bireý bizdiń shtabta boldy. PD ǵımaraty qırap turdy. Rasııaǵa sóılep júrgen birneshe azamatty kórdim. Olar jeke kabınetterdi qıratyp, kerek-jaraqty urlap, otbasymyzdy, ózimizdi, jaqyndarymyzdy óltiretinin, basymyzdy kesip alatynyn aıtty. Olardyń rasııaǵa aıtqan ár sózin qoıyn dápterime jazyp aldym. Ǵımaratqa áıelder men balalar kirip jatqandyqtan kezekshi ári qaraı ne isteý keregin surady. Men polısııa qyzmetkerlerine postty tastaýǵa bolatyny týraly buıryq túskenin aıttym", dedi Aıgúl Nurmuhanova.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir