Talǵar aýdanynyń turǵyndary jaryq, gaz, sýsyz qaldy. Ákimdik másele qashan sheshiletinin aıtty

Almaty oblysynyń ákimdigi Talǵar aýdanyna qarasty birneshe aýylda gaz, jaryq, ortalyqtandyrylǵan sý bolmaı qalǵanyna baılanysty pikir bildirdi.

Oblys ákimi baspasóz qyzmetiniń basshysy Ǵalymurat Júkeldiń aıtýynsha, magıstraldyq gaz qubyry qalpyna keltirilgen, qazir abonentterdi kógildir otynǵa qosý jumystary júrgizilip jatyr.

– Panfılov aýylynda gaz qosylǵan. Gúldala aýylynda abonentterdiń 80%-na kógildir otyn berildi. Tuzdybastaýda qaýipsizdik normalaryn saqtaı otyryp gazǵa qosý jumystary júrgizilýde. Gaz kompanııalary túske deıin gazǵa qosý isin qalpyna keltiretinine kepildik berdi, – dedi Ǵalymurat Júkel.

Ákimdiktegiler ortalyqtandyrylǵan aýyz sý men elektr energııasynyń óshýine keshe Panfılov aýylynda transformatorlyq qosalqy stansııanyń júktemesine baılanysty eseptegish, rýbılnık, birinshi kótergishtiń tereńdik sorǵysy órtengeni sebep boldy dep otyr.

– Osyǵan baılanysty sý berý toqtatyldy. Talǵar aýdanynyń «Talǵar sý» MKK qyzmetkerleri sorǵyny aýystyrý boıynsha jumystar júrgizdi. Sondaı-aq aýa-raıyna baılanysty Tuzdybastaý aýylyndaǵy Jeruıyq yqsham aýdanynda 300 úı jaryqsyz qaldy. Al Gúldala aýylynda 1500 úı elektrden ajyrap qaldy. Qalpyna keltirý jumystary júrgip jatyr, shamamen 13:00 shamasynda elektr energııasy beriledi, – deıdi oblys ákimi baspasóz qyzmetiniń basshysy.