Toqaev ózi kimmen jaryspaq?

Toqaev merziminen buryn prezıdent saılaýyn ótkizý týraly bastama kótergennen keıin saıası dodaǵa prezıdenttiń ózinen basqa kim túsedi degen zańdy saýal týady.

Prezıdent málimdemesine alǵash reaksııa tanytqan 2019 jylǵy saılaýǵa qatysqan saıasatker Ámirjan Qosanov boldy. Ol bul jolǵy dodaǵa da qatysýǵa qarsy emestigin jetkizdi. Alaıda Qosanovty halyq aldyńǵydaı qoldaı qoıa ma? Ol jaǵy úlken suraq...

Burynǵy kommýnıster, qazirgi Qazaqstan halyq partııasy úmitker usynbaıtynyn, "Amanat" Toqaevtyń kýrsyn qoldaıtynyn málim etti. Ásili Toqaev partııa qatarynan shyǵyp ketse de saılaýǵa "Amanat" atynan usynylady. Aqjol, JSDP, Aýyl partııalary úmitker usyný-usynbaý máselesin áli naqty sheshpegen. Tirkelmegen "El tiregi" partııasy da máseleni aldaǵy ýaqytta qarastyratynyn habarlady.

El ishinde prezıdent bolýǵa ambısııasy bar delinetin Baýyrjan Baıbek pen Nurlan Nyǵmatýlın qańtar oqıǵasynan keıin bılikten alastatylǵan. Qazir qaıda, ne istep júr, bul týraly ashyq, resmı aqparat joq. Esesine ekeýi de qylmystyq is fıgýranty bolýy múmkin degen áńgime bar. Eger bul ras bolsa, onda olardyń prezıdenttikke jarysqa túsýge murshasy da joq. Aıaqasty táýelsiz túrde taqqa talas jolyna qosylar bolsa, aldaǵy saılaýdyń kórkin qyzdyrar edi.

Imanǵalı Tasmaǵambetov. 2019 jyldan beri zeınet demalysynda bolǵanmen áli qaýsap turǵan joq. Qazirgi prezıdentten de jas. Onyń ústine oǵan yqylasty adam da az emes. Alaıda ol yqylasty top Tasmaǵambetov Aqordanyń oıyn erejesimen júrgenin emes, jeke ózi kóptiń sózin sóılep shyqqanyn qalaıdy. Al ony Tasmaǵambetov qalaı ma? Ondaı táýekelge bara ala ma? Bul da úlken suraq.

Qazaqstanda prezıdenttikke kandıdat adam 40 jastan asqan, sońǵy 15 jylda elde turǵan, 5 jyl memlekettik qyzmette istegen bolýy kerek degen talap baryn eskergende, saıasatpen shuǵyldanyp júrgen azamattardyń ishinde úmitker bolýǵa jararlyǵy tipten tarylyp qalady.

Sońǵy ýaqytta saıası belsendiligin jandandyrǵan Bolat Ábilov negizinen bıznespen aınalysqan, tek bir-eki jyl depýtat bolǵany bar. Janbolat Mamaı memqyzmetpen bir kún de aınalyspaǵan, onyń ústine jasy da jetpeıdi, ári jarty jyldan beri túrmede. "HAQ" qozǵalysynyń jetekshisi Toǵjan Qojalıeva da memlekettik qyzmette istemegen. Bıyl 8 naýryzda saıasatpen aınalysýshy áıelder kóp bolýy kerek mıtıng ótkizgen belsendiler de memlekettik emes sektorda qyzmet etedi, ári kóbi tym jas. Muhtar Jákishev pen Ǵalymjan Jaqııanov isti bolǵan, keıingisi birneshe jyldar beri shetelde. Qajygeldın týǵan topyraǵyn baspaǵaly jıyrma jyldan asty. Ári keıingi úsheýin qoǵamnyń keı ókilderi attaı qalasa da olardyń ózi prezıdenttikke talasa qoıady deý qıyn.

Búginde saıası alańda ózin kórsetip júrgen Muhtar Taıjan men Sanjar Boqaev joǵarydaǵy zań talabyna saı kelip qalýy múmkin. Taıjan prezıdent ákimshiliginde 4 jyl, keıin ulttyq kompanııalarda, aksıonerlik qoǵamdarda istegen. Sanjar Boqaev birneshe basqarmalarǵa jetekshilik etken, qysqa ýaqyt prezıdent ákimshiliginde istegen. Alaıda qos azamat ta saılaýǵa qatysý týraly ázirge tis jarmady. Taıjan tipti prezıdent saılaýyn merziminen buryn ótkizýge qarsy shyǵyp, oppozısııany osy másele tóńireginde toptasýǵa shaqyrdy.

Zańǵa saı, prezıdent málimdemesinen keıin eki aı ishinde saılaý ótýge tıis. Bul – saılaý kompanııasyn jan-jaqty ótkizýge tym qysqa, tipten 60 kúnde ol múmkin emes te. Qazirgi prezıdentke shynaıy básekeles bolam degen adamǵa esh múmkindik joq. Sonda Toqaev ózi kimmen jaryspaq? Qýyrshaq kandıdattarmen be, álde alda-jalqa sońǵy tuıaq serpý retinde shyǵa qalýy bek múmkin qolynda esh resýrsy joq eski oppozısııa ókilimen be? Ne de bolsa, aldaǵy eki aı bederi qyzyqqa oly bolǵaly tur.