Mekteptegi oqý jyly uzartylady. Tıisti buıryq jobasy shyqty

Qazaqstanda oqý jylyn eki aptaǵa uzartý josparlanyp otyr. Bul týraly Oqý-aǵartý mınıstrligi Mektepke deıingi jáne orta bilim berý komıtetiniń buıryǵynyń jobasynda aıtylǵan.

Buıryqqa saı, oqý jylynyń uzaqtyǵy 1-synyptarda – 35 oqý aptasynan (qazir 33 apta), 2-11 (12)-synyptarda 36 oqý aptasynan (qazir 34 apta) turady.

1-11 (12) – synyptarda: kúzgi kanıkýl – 7 kúndi (2022 jylǵy 31 qazan – 6 qarasha aralyǵynda), qysqy – 9 kún (2022 jylǵy 31 jeltoqsan men 2023 jylǵy 8 qańtar aralyǵynda), kóktemgi – 9 kúndi (2023 jylǵy 18-26 naýryz aralyǵynda) quraıdy

1-synyptar qosymsha 7 kún (2023 jylǵy 6-12 aqpan aralyǵynda) demalady.

Mınıstrlik qosymsha eki oqý aptasyn qosý arqyly oqý jylynyń uzaqtyǵyn ulǵaıtý bir kúndegi sabaqtar sanyn qysqartýǵa, bes kúndik oqý aptasyn iske asyrýǵa, "kúrdeli" taqyryptardy zerdeleý qarqyndylyǵyn tómendetýge, bilim berý prosesin damyta oqytý qaǵıdattarynda uıymdastyrýǵa múmkindik beredi dep sanaıdy.

Sondaı-aq mınıstrlik túsindirmesinde, jazǵy kezeńde kanıkýl kúnderiniń sanyn qysqartý ótken oqý jylynda bilimniń bir bóligin joǵaltý táýekelin, quqyq buzýshylyqtardy qysqartý, bilim alýshylardyń shamadan tys jumys isteý men syrqattanýshylyǵyn tómendetýdi kózdeıtini aıtylady.